Riyad Mahrez chuan Manchester City atangin Al Ahli a zawm fel a, a manah Saudi club chuan £30 million an insêng.
Algerian international hian 2019 khan £60 million in Leicester City atangin Manchester City a zawm a, khatih hunlaia City player man to ber anih bakah African player man to ber nghe nghe.
Kum 32 a upa hian Etihad Stadium a season 5 a châm chhungin trophy 11 zet a chawi hman a, chung zingah chuan Premier League title pali leh UEFA Champions League title pakhat te a tel bawk.
Leicester City forward hlui hian City tan season nga chhungin game 236 a khel a, goal 78 khungin tun hnai kuma City player thawhhlawk ber te zînga mi a ni.
Report tarlan danin Mahrez hian Al Ahli ah season thum chhung daih tur contract a ziak a, season khat chhungin £25 million a hlawh ang. Etihad Stadium ah Mahrez hian season khat chhungin £6 million aia tam hret a hlawh a, Saudi lamah erawh Premier League lama a hlawh zat let 4 aia tam mah a hlawh tihna a ni!
Saudi Pro League a kaithar team ni mahse Al Ahli an tang em em a, season tharah chet pui viau an tum. Kuminah Al Ahli in Roberto Firmino, Saint Maximin leh Riyad Mahrez te an lalut tawh a, Saudi Pro League club chu sawi loh Premier League clun thenkhat hmatawng te aia pawha thlanawm tur zawk anni!