Zanin (18th February, 2023) dar 11:00 hian Premier League table a 4-na ni mêk Newcastle United chuan an khelmual St James Park ah table a 9-na ni mêk Liverpool an lo mikhual dawn a, zanin bika Premier League inkhel hmuhnawm ber anih a rinawm.
Eddie Howe hnuaiah Newcastle United in season duhawm tak an hmang chho mêk a, league game 22 an khelh atanga point 41 hmu tawh in table ah 4-na anni mêk. Season thara Champions League khelh an duh chuan Klopp a nau te laka point hmuh a pawimawh dawn.
Liverpool lam ve thung hi Klopp hnuaia season an hman fuh loh ber tum a ni a, league game 21 an khelh atanga point 32 chauh la hlawhchhuakin table ah 9-na anni mêk. Reds hian top 4 huanga season khar an duh chuan team hmasawn tak Magpies laka point hloh a pawi thui ang.
Newcastle United hian an game hnuhnung 7 ah tlawm hmel an hmu lova, Reds hmachhawn turin an inpeih thawkhat viau. Liverpool lam erawh an game hnuhnung 7 ah vawi thum lai mai an tlawm a, Magpies hneh turin game tha an chhawpchhuah a tul dawn.
Team pahnihte hi an inhmachhawn hnuhnung vawi 5 ah Reds in vawi 3 hnehna an chang a, vawi hnih inhnehtawkin Newcastle hian tum khat mah hnehna an chang lo thung. An game hnuhnung thlirin Reds chu team chungnung zawk anni.
Newcastle lam atangin Manquillo, Targett, Krafth leh Willock te chuan hliam avangin Reds an hmachhawn thei dawn lova, Wilson leh Saint Maximin te dinhmun pawh hriatchian a nilo bawk.
Liverpool lam atang pawhin Thiago, Diaz, Arthur leh Konate te chuan hliam avangin Magpies an hmachhawn thei dawn lova, Liverpool fans te tana thu lawmawm tak erawh an defender rinrawl Virgil van Dijk inkhel tura a inpeih tawh thu hi a ni.
Newcastle Predicted XI – Pope, Trippier, Schar, Botman, Burn, Joelinton, Longstaff, Almiron, Gordon, Isak, Saint Maximin
Liverpool Predicted XI – Alisson, Arnold, Matip, Van Dijk, Robertson, Henderson, Fabinho, Bajcetic, Nunez, Gakpo, Salah