Inter Milan fans ruhkawlte chu Chelsea striker Romelu Lukaku lakah an lungawi lo hle a, Belgium striker chungchangah thuchhuah an siam hial!
Lukaku hian 2021 nipui bazar lai khan £97.5 million in Chelsea a zawm a, amaherawhchu Stamford Brigde ah beisei a phâk loh avangin season khat lek hnuah a lo chet that tawhna Inter Milan chuan loan in an lakir leh.
Inter Milan-a a kir leh hnu pawhin beisei a phâk tehchiam lova, hliam in a tlakbuak nasa bawk nen, season hman zawh takah khan Inter tan inelna hrang hranga game 37 a inlan atangin goal 14 leh assist vawi 7 a thawkchhuak. Mi tam tak chuan UCL final a Inter Milan chak loh chhanah Lukaku hi an puh hial a, Chelsea striker hian City lakah a chance tha neih a hlah nual anih kha maw!
Season a tawp a, nipui bazar lo inherchhuakin Inter chuan Lukaku hi a ngheta lâkluh an duh a, Chelsea lam pawh an dawr ngei. Mahse Lukaku ber hian Inter lam sawmna a pawm duh lova, transfer chungchangah Inter hmelma Juventus chu inbiakna neihpuiin Turin lama insuan a rilrûk a ni.
Lukaku hian Inter Milan a zah êm avanga Juventus lam a pan loh tur thu a lo sawi tawh a, mahse hei tunah Juventus lama kal turin a rilru a siam fel leh ta si! A chetdanah Inter Milan lam an lungawi lo hle a, Belgium striker hi ngaihven chhunzawm an tum tawh lo nia report a ni bawk.
Club hotute bakah fans te pawh an thinrim hle a, Inter Milan ultras te chuan Lukaku chungchangah hetiang hian thu an chhuah, “Lukaku, kan hmu leh tawh ngai lovang che. Kan zavai hian min phatsan a ni. Hun khirhkhan ah kan hum thin che a, tunah erawh kan hnungzangah min vit ta si! Kan club logo i fawh hnuin nangmah lei to ngam ber hnenah i va inzuar a, mipa dik tak i nilo!” tiin.
Lukaku hian kuminah Juventus a zawm ngei a rinawm a, Juventus striker Dusan Vlahovic chu Paris Saint Germain lama insuan tura ngaih a ni ve bawk.