Saudi Arabian club sawmna hnâwltu leh club thar la hmu thei mai lo Romelu Lukaku lakah Chelsea hotute’n dawhtheihna an tlachham tan viau.
Season hmasa ah loan a Inter Milan a zawm hnuin Chelsea ah Lukaku a kir leh a, pre season squad-a telh nilo mahse tunah hian Cobham ah training nei mêk in transfer window inkhar hma ngei a Stamford Bridge a chhuahsan a rinawm.
Kum 30 a upa hi Inter Milan chuan a ngheta lâkluh duh mahse a player berin manager leh a teammate te biakna a chhang duh lova, transfer chungchangah Inter hmelma leh elpui ni bawk Juventus a be pawp bawk.
Lukaku hian season hmasa khan bench a luahlum fova, UEFA Champions League final-a inkhelh bul a tan loh bawk avangin a lunghnur hle a, club chhuahsan turin thutlûkna a siam fel nia sawi a ni.
Juventus hotute chuan Chelsea leh Man Utd striker hlui hi an duh ngei a, amaherawhchu an striker Dusan Vlahovic an chân chauh in a ni ang. Serbian striker hi Paris Saint Germain lam nena sawizawm anni a, mahse tun hnai mai khan Ligue 1 champion hian Atalanta striker Rasmus Hojlund lam hawiin Vlahovic hi an dawr chhunzawm dawn em hriat a nilo.
Vlahovic an Turin khawpui a chhuahsan loh chuan Juventus in Lukaku an lalut dawn lo. Club medical centre bulah Juventus fans thahnem tak te chu pungkhawmin Romelu Lukaku lâkluh an duh zo an auchhuahpui a, banner hial an tarchhuak! Hei hian Lukaku laka Juventus hotute ngaihdan a thlâk danglam thei maithei bawk.
A hma hun chiang lo ruai karah Saudi lam chuan Lukaku hi lâkluh an duh a, a manah £43 million lai offer in hei hi European club lian te offer ai pawha tam zawk a ni.
Amaherawhchu Belgium striker hian tunah rih chuan Saudi lam pan tumna a la nei lova, Europe a la cham zel rih a duh. Europe a la inkhelh chhunzawm zel duh mahse club thar a hmuh maithei loh avangin a lakah club hotute an lungawi lova, dawhtheihna pawh an tlachham tan viau niin report chuan a tarlang.
Lukaku hi Blues tana inlan leh a duh tawh lova, Chelsea lam pawhin an striker hi kumina hralhchhuah ngei an tum ve mêk bawk.