Romelu Lukaku khawsak danah Inter Milan lam an lungawi lo hle a, a chhan pawh Juventus lam nena sawizawm mek annih karah Lukaku hian a teammate leh manager te message leh call a chhanlet duh loh vang a ni.
Chelsea player dangte’n pre season training tan tawh mahse Lukaku erawh chawlh pêk a la ni a, Belgium striker hian kumin nipui bazarah Stamford Bridge a chhuahsan ngei a rinawm.
Journalist Gianluca Di Marzio chuan Lukaku lakah Inter Milan an lungnih loh thu a tarlang a, Chelsea striker hian transfer chungchanga Inter player leh manager te biakna chu a la chhanglet duh hauh lo!
Belgium striker hian Inter Milan a zah êm avanga an hmelma club Juventus a zawm ngai loh tur thu lo sawi tawh mahse tunah hian Juventus zawm a rilrûk mek tih a khawsak danah chiang takin a lang.
Juventus chuan Lukaku man tur £32m + £1.5m add ons an offer a, amaherawhchu an striker Dusan Vlahovic an hralhchhuah chauh in an offer hi a nung ang. Vlahovic hi Paris Saint Germain chuan lâkluh ngei tumin tan an la a, Serbian international hian Parc des Princes lama insuan a hreh lo bawk.
Inter Milan chuan season hmasaa loan a an hawh Lukaku hi a ngheta lâkluh an tum ve mêk a, Juventus offer zat tho khi offer mahse a an offer chhawpchhuah dan erawh £30m + £3.5m add ons ang in a ni thung.
Kum 30 a upa striker hian Allianz Stadium lama insuan a rilrûk mêk tih a lang a, transfer chungchangah a agent leh Juventus hotute an inbe pawp tawh nia report niin hemi chungchangah hian Lukaku club hlui Inter lam an lawm lo hle nia sawi a ni bawk.
Engpawhnise Chelsea lam chuan an striker hi hralhchhuah thuai an duh a, kum 30 a upa hian San Siro nge Allianz Stadium a pan dawn tih chu kan hre chho zel ang.