Inter Milan legend Nicola Berti chuan Romelu Lukaku chu a inlamlet anih phawt chuan a ngaihdam theih tur thu a sawi.
Lukaku hian season hmasa khan loan in Inter Milan a zawm a, hliam avanga beisei a phâk loh deuh chung pawhin Inter Milan chuan a ngheta lâkluh tumin Chelsea lam an dawr. Amaherawhchu Lukaku ber hian Milan lama a teammate leh coach te biakna a chhang duh lova, Inter Milan hmelma Juventus chu transfer chungchangah be pawp in Turin khawpuia insuan a rilrûk.
A chet dan avang hian a chungah Inter lam an lungawi lo hle a, club hotute chuan Lukaku hi dawr chhunzawm zel an tum lova, Inter Milan ultras te pawhin Belgium striker chungchangah thu rum tak an chhuah.
Tun hnaia report tarlan danin Juventus lamin Lukaku hi dawr bawk mahse an lâkluh theih an ring lova, a chhan pawh an striker Dusan Vlahovic lâkluh tumtu Paris Saint Germain lamin Atalanta striker Rasmus Hojlund lam an hawi vang a ni.
Juventus in lâkluh theih an inrin loh hnuin Lukaku hian Inter Milan hotute hnena ngaihdam dil a, inlamlet a rilrûk mêk nia sawi a ni.
Inter legend Berti chuan Lukaku hi a inlamlet anih chuan a ngaihdam theih tur thu Gazetta dello Sport kaltlangin a sawichhuak, “Lukaku nungchang hi a danglam a, Inter ngaihsak tu tan chuan a mak in pawm zam theih mai mai tur a nilo. Mahse a inlamlet a, thupha a chawi chuan ka ngaidam thei ang. Hringnun ah chuan tihsual chan kan nei thin a, mawi lo takin lo che tawh mahse atana Inter kawngka khar hi keichuan ka thei lovang” a ti.
Tun dinhmunah kum 30 a upa hma hun tur a la chiang lova, a club Chelsea pre season squad ah a telh loh bakah club thar han zawm hnai mai lah a la nei hek lo. Saudi lam atanga sawmna a hnar fel tawh nen, season tharah Lukaku hian khawi lam nge a tuan dawn a la hriat mai loh.