Zanin zanlai/ naktuk zinglam (22nd February) dar 1:30 AM hian UEFA Champions League Round of 16 khelh chhunzawm leh a ni dawn a, 1st leg match ah Liverpool chuan an khelmual Anfield ah champion lai Real Madrid an lo mikhual ang. Team pahnihte hi season hmasa a UCL finalist te anni a, Vinicius Jr goal khat hmangin Spanish club lamin hnehna an chang a, Europe a team tha ber nihna an hauh anih kha.
Zaninah Jurgen Klopp leh a nau te’n Madrid lakah phuba lakna hun tha an nei thei dawn a, chutihrualin Carlo Ancelotti hote pawhin an nomawi kawllai hi humhim ngei an tum dawn avangin inkhel hmuhnawm tak beisei phawt mai rawh le. Tun season UCL ah Liverpool hian Group A ah pahnihna niin group stage an khar a, Real Madrid lam erawh Group F a pakhatna niin knockout round an lut thung.
Team pahnihte hi an inhmachhawn hnuhnung panga ah Reds lam vawikhat mah an chak lova, Real Madrid hian tum 4 lai mai hnehna changin match khat ah erawh team pahnihte an inhnehtawk thung.
Liverpool in an game hnuhnung 5 ah vawi 2 chiah hnehna an chan laiin Real Madrid lam erawh an game hnuhnung 5 ah vawi 4 an chak thung a, tun hnaia team pahnihte match result neihdan en in Madrid lam dah chungnun a awl deuh zawk. Zanina an inhmachhawnna tur erawh Anfield anih miau avangin Klopp a nau te hian chance an nei tha thawkhat viau e.
Injury News – Liverpool lam hian hliam avangin Arthur leh Luiz Diaz te an chhawr thei dawn lova, Darwin Nunez erawh a fit hman beisei a ni. Real Madrid lam pawhin Mendy an chhawr theih dawn lo bakah Toni Kroos leh Tchouameni te dinhmun pawh tun thlenga hriatchian theih a la nilo bawk.
Liverpool Predicted XI – Alisson, Arnold, Gomez, Van Dijk, Robertson, Henderson, Fabinho, Bajcetic, Gakpo, Nunez, Salah.
Real Madrid Predicted XI – Courtois, Alaba, Rudiger, Militao, Carvajal, Ceballos, Camavinga, Modric, Vinicius, Benzema, Valverde.
