Roberto Firmino chuan Liverpool-a a contract neihlai a hman zawh hnuin Saudi Arabian club Al Ahli chu free agent in a zawm a, Saudi Pro League a kaithar team tan hian kum 3 chhung daih tur contract ziak in a contract hlut zawng hi signing bonus nen chuan €100 million vel nia report a ni.
Kum 31 a upa hian 2015 khan German club Hoffenheim atangin Liverpool a zawm a, Anfield a kum 8 a khawsak hnuin England a chhuahsan fel. Brazilian international hi a club thar Al Ahli ah Chelsea goalkeeper hlui Edouard Mendy nen an khel dun thei dawn a, Senegalese international hi Al Ahli chuan Firmino an sign hma in an lo sign tawh a ni.
Liverpool a Firmino vanglai tak tak kha kan la mitthla thei ang chu, Mohamed Salah leh Sadio Mane te nen attacking trio hlauhawm zet mai an din a, club dangte defense an thiatdarh hneh in goal lah an khung tam narawh. Man City boss Pep ngei tan pawh Liverpool attacking trio hmachhawn kha a awlsam lova, a lu tihai fotu anni.
Firmino an Anfield a season 8 a cham chhungin club level a trophy chawi theih tur zawng zawng a chawi kim a, chung zinga hlu zual chu UEFA Champions League leh Premier League te anni.
Firmino chauh hi kumin nipui bazara Anfield chhuahsan a ni lova, player dang Naby Keita, James Milner leh Alex Oxlade Chamberlain te pawh in contract an hman zawh hnuin Merseyside club hi an chhuahsan ve bawk.
Anfield a season 8 a khawsak chhung hian Firmino chuan a club hlui tan game 362 a khel a, goal 111 khungin assist vawi 79 a thawkchhuak bawk. Jurgen Klopp hnuaia player pawimawh ber te zinga mi niin tun hnaia kuma Liverpool hlawhtlin theih nan a thawhhlawk takzet. Tunah Anfield chhuahsan tawh mahse club tana a thiltih zawng zawng te hriat reng a ni tawh dawn a, Firmino hi engtik lai pawha Liverpool legend ni reng tawh tur a ni.