Liverpool leh Arsenal te’n Shakhtar Donetsk winger inchuh dawn – Fabrizio Romano

Italian journalist Fabrizio Romano tarlan dan in Premier League club lian pahnih Liverpool leh Arsenal te chuan Shakhtar Donetsk winger Mykhaylo Mudryk lakluh tum in an inchuh dawn.

Kum 21 a upa hi tun hnai kuma player beiseiawm ber te zinga mi a ni chho va, Thlasik transfer bazar-a amah lakluh tumtu European club lian thenkhat te’n an bihthla mek. Mudryk hian tun season kal mek ah a team tan game nga a inlan atangin goal hnih leh assist vawi thum a nei tawh.

Premier League club pahnih Brentford leh Everton te chuan transfer bazar hnuhnung ber khan Mudryk hi lakluh an lo tum tawh a, mahse Ukraine international hian club pahnih te sawmna hi a lo hnar. Tunah erawh club lian pahnih Arteta enkawl Arsenal leh Jurgen Klopp kaihhruai Liverpool te an rawn inlar tan a, Mudryk hian Ukraine Premier League a chhuahsan hnai viau maithei.

Tin, Premier League club lian pali Arsenal, Liverpool, Chelsea leh Manchester City te chuan Villareal winger Alex Baena an ngaihven mek tih TEAMtalk chanchinbu chuan a tarlang. Spanish club lam hian an player release clause chu heng team lian te hian awl ai taka an pektlak theih mai an rin avangin an hlauthawng ru hle.

Baena hian tun season kal mek ah Villareal tan game 10 a inlan atangin goal 6 a khung tawh a, heng game 10 atanga a minute khelh zawng zawng belhkhawm chu minute 368 chauh a ni. Chumi awmzia chu kum 21 a upa hian tun season ah minute 61 dan zela goal khung ang a ni. Tun season kal mek ah Manchester City striker Erling Haaland hian minute 59 dan zela goal khung ang a ni a, chu chuan goal hmaa Spanish rawlthar Alex Baena hriam zia a tarlang chiang viau awm e.

Related Posts

error: Content is protected !!