Manchester United manager Erik Ten Hag chuan tun Pathianni zana an hmachhawn tur Liverpool chu khelhpui an awlsam loh tur thu a sawi.
Ten Hag leh a nau te hian ni tlem te liam ta khan Wembley Stadium ah Newcastle United chu sihnih faia hnehin Carabao Cup an chawi a, 2017 hnua Man Utd trophy chawi leh hmasak ber tum a ni nghe nghe.
Man Utd hian Magpies hneha nomawi an chawi hnu hian FA Cup 5th round ah 3-1 in West Ham United an tukdawl leh bawk a, quarter final an lut. Red Devils game leh tur hi league game niin an hmelma hlun Liverpool khelmual Anfield ah tun Pathianni zan dar 10 hian an leng lut dawn.
Top 4 huanga season khar tum Liverpool in season chawhnu lam ho taka hman an tum lova, an game leh ah Man Utd an hmachhawn hunah pawh fans te nen tang ho a hnehna chan ngei an tum ang. Dutch boss Ten Hag pawhin an game khelh leh tur hi a awlsam dawn lo ti a hre chiang a, Reds lakah a nau te’n theihtawpa tan an khawh a tul tur thu a sawi.
”Game boruak pui tak a ni dawn a, hmelma ang mai in min lo mikhual dawn a mahse keini lam duh dan a ni mah zawk. Kan tan chuan inenfiahna tha tak a ni dawn a, Liverpool hmachhawn hi kan nghakhleh tawh hle. Ka team player te hi ka hrechiang a, tha taka inbuatsaih in inrintawkna nen game an khel ang. Amaherawhchu game harsa tak in min hmuak tih erawh kan hre chiang hle. Kan tuar dawn tih pawh kan hre lawk a, result tha nei turin kan theihna zawng zawng kan hlan a ngai dawn” tiin Ten Hag an Anfield a Liverpool hmachhawn a awlsam loh tur thu a sawichhuak.
Man Utd hian season kal mek ah league game 24 atanga point 49 hmu tawhin table ah 3-na anni mek a, league title chawi turin chance an la nei. Hetih mek laiin Liverpool lam pawh hma an sawn chho zel a, league game 24 an khelh atanga point 39 hmu tawhin table ah 6-na anni mek. Top 4 huanga season khar turin Klopp leh a nau te’n Man Utd laka result tha an hlawhchhuah a pawimawh ang.
