Liverpool chuan RB Leipzig atangin euro 70 million in Dominik Szoboszlai an lakluh fel thu an puang a, kum 5 chhung daih tur contract an ziahpui.
Jurgen Klopp chuan a midfield lai thawmthat chu hna pui ah neiin Brighton atanga World Cup winner Alexis MacAllister a sign hnuah Leipzig atangin Dominik Szoboszlai a sign fel leh bawk.
Kum 22 a upa Hungarian international hian season hmasa khan German club tan game 48 a inlan atangin goal 10 leh assist vawi 12 a thawkchhuak a, RB Leizpig player zinga goal+assist thawkchhuak hnem ber a ni nghe nghe. Tin, a ram Hungary tan pawh vawi 32 lai a inlan tawh bawk a, a kum lam la tam hauh lo mahse club leh ram tana player pawimawh a ni.
Szoboszlai hian Liverpool a zawm theih avanga a lawm thu Liverpool website kaltlanga sawichhuakin, “Tun hnai ni tlemte chhung kha nuam ka ti hle a, ka teammate thar te pawh hriatchian leh zual ka chak tawh hle. A tawp a tawp ah chuan he hmunah ka awm thei ta a, ka lawm in bul tan thuai thuai ka chak tawh takzet.”
”Liverpool hi sulhnu ropui tak nei club a ni a, player leh coach te bakah engkim mai hi a tha vek a ni. Ka tan chuan rahbi thar kaina tura hmun duhthusam a ni a, fans, stadium leh engkim mai a tha vel vek a ni ber” a ti.
Szoboszlai hian Steven Gerrard leh Naby Keita te lo hak thin jersey number 8 ngei mai a ha dawn a, a lakah Liverpool fans te beiseina pawh a sang vet vet hle ang le.