Liverpool chuan Romeo Lavia man tur £45 million bid chu Southampton hnenah an theh lut dawn niin report chuan a tarlang.
Lavia man tura an bid hmasa ber £35 million hnâwl ni tawh mahse Merseyside club an la beidawng mai lova, a tum hnih nan £42.5 million + £2.5 million add ons an theh lut leh dawn niin Italian journalist leh transfer expert Fabrizio Romano chuan a tarlang.
Liverpool hian kuminah an midfielder pali Jordan Henderson, James Milner, Alex Oxlade Chamberlain leh Naby Keita te an chân fel tawh a, Brazilian midfielder Fabinho pawhin Anfield a chhuahsan hnai bawk.
Hetiang anih takah chuan Klopp an a midfield lai thawmtha turin midfielder pahnih Alexis MacAllister leh Dominik Szoboszlai te a lalut tawh a, heng player pahnihte manah hian £100 million dawn an insêng nghe nghe bawk.
Amaherawhchu Merseyside club an la duhtawk mai lova, midfielder dang lâk belh an la rilrûk. Tun dinhmunah Southampton leh Belgium rawlthar Romeo Lavia chu Liverpool top target a ni mêk a, kum 19 a upa lâkluh tum hian Reds chuan tan an khawh mêk.
Saints lam hian an midfielder manah £50 million an phut nia sawi a ni a, Reds lam offer pahnihna add ons nena £45 million hi an pawm kher ang em tih chu kan hre chho thuai ang.
Mimal thilah harsatna a awm dawn lova, player mana club pahnihte an inrem fel theih chuan Lavia an Anfield a pan ang.