Liverpool chuan Swedish star Alexander Isak chu lak luh an tum niin report in a tarlang. Isak hi Real Sociedad tan season khelh zawh takah khan a che tha hle a, club tana a chet thatna chhunzawmin Euro 2020 ah pawh Sweden tan a che tha leh hle.
Express in a tarlan dan chuan Liverpool hian tun summer transfer lo awm turah striker thar lak luh an tum a, an striker Roberto Firmino thlaktu tur atan hman nghal an tum niin a tarlang.
Alexander Isak hian kum 2019 khan Borussia Dortmund atangin Real Sociedad a zawm a, Real Sociedad a zawm hma hian Borussia Dortmund tan khelin season 2 chhung awmin khel mahse, a hlawhtling zo lo. La Liga lama a insawn hnu hian hma a rawn sawn chho hle 2019-20 season khan all competion-ah match 45 a khelh atangin goal 16 a khung tling a ni.
Season khelh zawh takah pawh khan a che tha ang reng a, Real Sociedad tan La Liga match 34 a khelh atangin goal 17 a khung. Real Sociedad chu La Liga table-ah parukna dinhmun a hauh pui a, season thar lo awm turah hian Europa League an khel pha chiah chiah dawn a ni.
Isak hi club lama a chet that ang chiahin ram tan pawh a che tha a, Euro 2020 group match khelhah Sweden chu hmahruaitu a nih pui a, knock out stage ah an inhlangkai.
Season khelh zawh takah khan Liverpool chuan an defence line-ah buaina an tawh deuh avangin season thar inbuatsaihna atan RB Leipzig defender Ibrahima Konate chu £36 million in an la lut a ni.
Liverpool hian defence line-ah chauh harsatna an tawk lova, attacking trio lamah pawh harsatna an tawk tho, Brazilian striker Roberto Firmino hian 2020-21 season khan all competition ah goal 9 chiah a khung thei a ni.
Liverpool hian Roberto Firmino thlaktu tur atan Alexander Isak hi lak luh an duh a ni.
Source Sportskeeda