Liverpool in Man Utd laka zahngaihna an lantir lo!

Liverpool chuan nizan zanlai khan an khelmual Anfield ah an hmelma hlun Manchester United an lo mikhual a, Klopp leh a nau te hian tun hnaia form tak leh nomawi chawi hlim Erik Ten Hag leh a hote lakah zahngaihna an lantir lova, an lo sawp nghek!

He match ah hian Reds chuan 7-0 ngawt mai in an khingpui Red Devils an chungtlâk a, Darwin Nunez, Mohamed Salah leh Cody Gakpo te’n goal hnih theuh an khung bakah substitution bench atanga rawn lut Roberto Firmino chuan a tih kim nan ti ni âwm takin goal khat a rawn thawh ve bawk.

Red Devils laka goal hnih khungtu Mohamed Salah chuan record thar a siam ta nge nge a, Liverpool tana Premier League goal khung tam ber record (129 goals) niin Robbie Fowler record (128 league goals for Liverpool) chu nizan khan Egyptian international hian a rawn khum ta chiah a ni.

Manchester United tan erawh zan lungngaihthlak tak a ni a, December 1931 hnua an tlawm nasat ber na match niin chu pawh an hmelma lian ber tia chhal ngam Merseyside club Liverpool lakah a ni leh zel!

Liverpool tan top 4 beiseina mei a la nung zel a, league game 25 atanga point 42 hmu tawh in table ah 5-na anni mêk a, an chung chiaha awm leh an aia game khata khel tam zawk Spurs chu point 3 bak in an phâk tawh lo. Klopp leh a nau te hian an game leh ah Bournemouth chu league ah an hmachhawn dawn a, hemi zawh hian UCL Round of 16 2nd leg ah Real Madrid an hmachhawn zui ang.

Hetih mêk lai hian Manchester United chuan season kal mêk ah league game 25 atanga point 49 hmu tawhin table ah pathumna anni mêk a, an game leh ah Real Betis chu Europa league round of 16 first leg match ah an hmachhawn ang. Ten Hag leh a nau te’n a rang thei ang bera insiamthat an tum ngei ang le.

error: Content is protected !!