Site icon HUAPZAU

Liverpool in loan-a Mbappe hawh an rilrûk

Kumin nipui bazara Paris Saint Germain chhuahsan tura ngaih Kylian Mbappe chu Liverpool lamin loan a hawh an rilrûk mêk.

Mirror tarlan danin Mbappe loan deal chungchangah Liverpool leh Paris Saint Germain hotute’n inbiakna an nei a, Reds lam chuan France captain hi season khat chhung atana hawh-a a loan fee thahnem tak pêk an inhuam.

Paris Saint Germain chuan kum 24 a upa forward hi hralhchhuah an tum hle a, a chhan pawh contract thar ziah a tum loh vang a ni. Saudi Arabian club Al Hilal chuan Mbappe lâkluh tumin tan an la a, a manah €300 million bakah season khata a hlawh tur bonus telin €700 million lai pêk inhuam mahse Mbappe hian Middle East lama insuan a la tum mai lo.

Ligue 1 top scorer ni lai mêk hian Paris Saint Germain an kum 2024 June thla thleng bak contract a nei tawh lova, nakkumah free transfer a Santiago Bernabeu lam pan turin Real Madrid chu inremna a neih fel pui tawh ah PSG chuan an ngai.

Real Madrid head coach Carlo Ancelotti an forward an neih that thu leh tuna an squad neih-a a lungawi thu a lo sawi tawh a, chuvangin kuminah sum tam tak sênga Mbappe lâkluh ai chuan nakkumah a thlawna lâkluh an duh zawk mahna.

Real in Mbappe hi an dawr lo anih chuan loan-a hawh tumtu Liverpool lamin France forward hi an chang lo ang tih a sawi theih lova, chutihrualin player duhthlanna ah thil thui tak a innghat ve bawk.

Kan hriat ang in Reds hian season tharah UCL an khel dawn lova, Europa League an khel thung ang. Mbappe hian Europa League khel tur team a zawm duh ang em tih chu zawhna awm mêk a ni a, chutihrualin PSG ah season tluana bench luahlum leh thlauhthlâk nih ai chuan club lian danga season khat lek chhung khelh chu a tana thil thlanawm tur zawk a ni.

Exit mobile version