Bournemouth chuan Premier League match ah Liverpool chu an khelmual Vitality Stadium ah an lo mikhual a, mual neitu lam hian sikhat faia hnehna changin point 3 hlu tak an hlawhchhuak.
Bournemouth hian kar liamta khan Emirates Stadium ah sihnih faia hma an hruai tawh hnuin goal 3 an chhuah a, point hlawhchhuak lovin Emirates Stadium an chhuahsan. Tun tumah erawh Reds laka an goal khung awmchhun an venghim tluan thei hlauh.
7-0 a Manchester United sawptu Liverpool in table mawng lama awm Bournemouth an ngam lo hlauh a, Mohamed Salah chuan ama ang lo takin penalty a hlah.
Cherries laka tlawm Liverpool tan top 4 beiseina a hniam tial tial a, season thara Champions League khelhpha turin an hna a la hautak hle. Chutihrualin Liverpool laka hnehna chang Bournemouth chuan Relegation Zone chhuahsanin table ah 16-na anni ta.
Inkhelh tan atanga minute 6 na lekah Liverpool in goal an khung teuh hle a, corner atanga Arnold ball cross chu Van Dijk an lo tauh in Lerma chuan ball in goal line a thlen hma in a lo tichhuak hman hlauh. Cody Gakpo goal khung pawh Offside vanga pawm loh a ni bawk.
Minute 28 na ah Bournemouth lamin goal an khung a, Ouattara ball cross chu Billing an a pet lut.
2nd half ah Klopp chuan Elliott lachhuakin Jota an dah lut a, Portuguese international hian inkhel mual a rah atanga minute 4 na lekah goal a khung teuh hle a, a shot chu goalkeeper Neto an a lo dang hlauh.
Adam Smith hand ball avangin Liverpool chuan minute 68 na ah penalty an hmu a, Salah an goal ah a chantir thei lova, Liverpool in point an hmuh loh chhan pawh a ni.
Bournemouth an inveng tluan thei a, hamrik a rik tawp rualin point 3 hlu tak an hlawhchhuak tih fans te’n an hria a, an lawm hle.