Liverpool in top 4 huanga season khar turin an game leh pahniha hnehna an chan ngei ngei a tul thu club legend Jamie Redknapp chuan a sawichhuak.
Reds hian nizan khan Selhurst Park ah mual neitu Crystal Palace chu goal awm lovin an inhnehtawk pui a, an tan top 4 beiseina a hniam tial tial.
Palace hma chiah hian UEFA Champions League Round of 16 1st leg ah Real Madrid chu 2-5 in an ngam lo bawk a, he result duhawm lo zet hian team player te inrintawkna an hnukhniam deuh ni pawhin a lang.
Liverpool tan 1991-2002 inkara game 237 lo khel tawh Jamie Redknapp chuan Jurgen Klopp leh a nau te’n an game leh pahniha an chet dan in season tawpa an dinhmun tur thui taka a hril ngei a ring.
Kum 49 a upa Redknapp chuan, “Liverpool hian an game leh pahniha hnehna an chan ngei ngei a tul tawh. Heng match pahnihte hi home ground a khelh tur a ni dawn a, kar liamtaa an chetdan avangin an rinna hloh deuh mahse an game khelh leh tur pahnihte hian team player te ah inrintawkna nasa zawk a thlen ngei ka ring.”
”Fans te pawhin nidanga an tih dan thin ang in an thlawp tlat tur a ni a, an game khelh leh tur pahnihte hian team ah danglamna nasa tak a thlen theih ka ring tlat a, season tawpa an dinhmun tur pawh a hril thui viau awm e. Tun season ah beisei an pha lovin inrintawkna pawh an tlachham hle a, amaherawhchu tuna an squad en in top 4 huanga season la khar thei tur anni” a ti.
Point 36 nena league table 7-na a awm mek Reds hian an game leh ah Wolverhampton leh Manchester United te chu Anfield ah an lo mikhual dawn a, heng match pahnihte atanga result duhawm an hlawhchhuak thei anih chuan an dinhmun an siam thei deuh ngei ang.