Dutch international Virgil van Dijk chuan Liverpool captain thar anih theih chuan chu chu a tana chawimawina ropui anih tur thu a sawi.
Liverpool captain hlui Jordan Henderson an Saudi club Al Ettifaq a zawm fel bakah vice captain hlui James Milner pawhin season thar atangin Brighton & Hove Albion tan a inlan tawh ang.
Hetiang anih tâkah chuan Reds in team captain leh vice captain thar an ruat ngei a ngai dawn a, tun hnai kuma Liverpool hnung dawltu rinawm Virgil van Dijk chu Reds captain thar ni tura rinkai ber te zînga mi a ni.
Captain thar chungchanga reporter te zawhna Van Dijk chuan hetiang hian a chhang,”Captain chungchang hi la tihchian loh a ni a, chuvang chuan hemi chungchangah hian thil tam tak ka sawi thei mai bik lo. Mahse, ni e, tun hnai kum hnih liamta chhungin captain armband hi vawi tam ka lo hrêng tawh a, chung te chu ka tana inchhuanna hun pawh a ni. Eng nge thleng kan hre chho zel dawn a, he team captain ka nih theih hlauh chuan ka tana chawimawina ropui a ni ang” a ti.
2018 a Anfield pantu Van Dijk hi tuna Liverpool squad ah chuan club a cham rei ber pawl a ni a, Henderson leh James Milner te’n inkhelh bul an tan loh in emaw lâkchhuah an nih in captain armband a lo hrêng fo tawh.
Reds in season tan hma in captain thar an ruat dawn a, Virgil van Dijk bakah Mohamed Salah, Andy Robertson, Trent Alexander Arnold leh Alisson Becker te chu Liverpool captain thar ni tura rinkai deuh te anni.