Premier League club lian thenkhat Liverpool, Arsenal leh Chelsea te chuan Southampton midfielder beiseiawm Romeo Lavia chu kumin nipui bazar hian lakluh tumin an inchuh dawn.
Premier League atanga Southampton an relegate avangin Lavia hian St Mary’s Stadium chhuahsan a duh a, an chhiarna man zata leichhuak ngam am awm chuan club lian dang zawm a hreh dawn lo.
Liverpool chuan an midfield lai thawmtha turin Alexis MacAllister leh Dominik Szoboszlai te an sign fel tawh a, player pahnihte manah ringawt pawh £100 million dawn an inseng der tawh. Amaherawhchu an la duhtawk mai dawn lo niin a lang a, Siants midfielder Romeo Lavia sign tumin tan an la leh mek. Lavia bakah Bayern Munich midfielder Ryan Gravenberch, Borussia Monchengladbach midfielder Manu Kone leh Nice midfielder Khephren Thuram te pawh Reds nena sawizawm mek player te anni.
Arsenal lam pawhin an midfield lai thawmtha turin Kai Havertz an sign fel tawh bakah Declan Rice an sign fel tep a, player pahnihte manah hian £170 million an inseng dawn! Mikel Arteta chuan Lavia hi a la beisei cheu a, thla hmasa lam daih tawh atang khan Lavia lakluh tumin tan an lo la tawh nia report a ni nghe nghe.
Liverpool leh Arsenal te iang in Chelsea pawh Lavia lakluh tumtu zingah an tel. Blues hian Brighton atangin Moses Caidedo lakluh ngei tumin tan an la mek a, Ecuadorian international manah hian an inhuam thui viau bawk. Chutihrual chuan midfielder dang lakluh leh ngei an la duh a, a chhan pawh kuminah midfielder Mateo Kovacic, Mason Mount, N’Golo Kante leh Ruben Loftus Cheek te an chan vang a ni.
Kum 19 a upa Belgium international Lavia hi Manchester City academy chhuak niin nikum nipui bazar lai khan Southampton chuan City atangin £10 million + add ons £4 million in an sign a, City hian an duh chuan 2024 hnuah £38 million in an la let leh thei ang. Amaherawhchu Lavia hi Saints in club dang hnenah an hralhchhuah chuan City in laklet theihna dan an nei tawh lovang.
Saints chuan an midfielder beiseiawm tak, club lian te awhrawn mek manah hian £50 million an chhiar a, Chelsea, Liverpool leh Arsenal te chuan lakluh tumin an inchuh ang.