Paris Saint Germain star Kylian Mbappe chuan Premier League club a zawm dawn rau rau anih chuan Liverpool aiin Arsenal lama kal a duh zawk niin report chuan a tarlang.
Kan hriat ang in Mbappe leh PSG hotute inkarah inrem lohna a awm mek a, Mbappe hian nakkumah a thlawna chhuah a duh laiin PSG hotu lam chuan contract thar a ziah loh chuan kuminah hralhchhuah ngei an duh thu chiang takin an sawi thung.
Real Madrid lam chuan Mbappe hi an duh ngei a, amaherawhchu 2023-24 season a an ruahmanna ah a tel lo nia sawi a ni. Los Blancos hian Jude Bellingham lakluh nana €112 million an insen tawh bakah striker thar Joselu chu Espanyol atangin loan in an hawh a, season zawh rualin a nghetin an lalut thei bawk ang. Nimin lam khan Arda Guller an sign fel leh bawk a, tun thlengin erawh official taka Mbappe an dawr thu hriat tur a la awm lo.
PSG lam chuan an forward season khat bak club a contract nei tawh lo Mbappe an contract thar a ziah dawn loh chuan kumin nipui bazarah hralhchhuah ngei an duh a, PSG president Nasser Al Khelaifi chuan Mbappe chu a hma hun tichiang turin karkhat tha bak a neih loh thu a sawichhuak hial.
Ligue 1 champion hian kum 24 a upa manah €200 million an chhiar nia report a ni a, hetiang zata tam hi Mbappe ngaihven ve tu Premier League club lian pahnih Liverpool leh Arsenal te chuan player pakhat manah an theh chhuah ngam a rinawm lova, nikum khan Real chuan khitiang zat vel khian Mbappe chu an lo dawr tawh ngei a, kuminah erawh khitiang zata tam sum khi an theh chhuak hauh in a rinawm loh. Chuvang chuan PSG hian Mbappe an hralhchhuah ngei a ngaih chuan €200 million lo deuh, man tlawm zawka chhuahtir pawh an duh zawk mahna.
Independent tarlan danin Mbappe hian Premier League lam a pan dawn chuan amah duhtu Liverpool lam ai chuan Arsenal zawm a duh a, a chhan pawh Mikel Arteta hnuaia Arsenal team hmasawnna chuan a lung a dum em vang a ni.
Gunners hian season hmasa khan pahnihna niin league ah season an khar a, mite beisei phak baka rawn che tha in an champion teuh hle nghe nghe anih kha. Kumin nipui bazarah Mikel Arteta an a squad a thawmtha mek a, a player lakluh tawh leh lakluh tur te pawh an hrawl in star lian tak tak te pawh Gunners hi team zawm chakawm tak anni tawh reng a ni.
