FC Barcelona superstar Lionel Messi chuan Ballon d’Or vawi 6 dawng tawhin, player zawng zawng zinga dawng hnem ber a ni mek. Ballon d’Or hi footballer che tha te hnenah pek ani thin a, mimal chawimawina award-ah chuan ropui ber leh hlu ber pakhat a ni.
Juventus superstar Cristiano Ronaldo leh Lionel Messi hian kum 10 chhung teh meuh mai Ballon d’Or an dawng a, kum 2018 khan Luka Mordric chuan an kaltluang lai a tih tawp sak a ni.
2020-21 season kha Lionel Messi enletna a ni thei ang. 2020 summer transfer lai khan Barcelona chhuahsan a duh. Mahse, Barcelona lam khan a chhuah an rem ti lova a awm chhunzawm a nih kha. Hetihlai hian a thian tha tak leh partner ni bawk Luis Suarez chuan club a chhuahsan a, amah thlahna ceremony pawh an hmang lo.
FC Barcelona tan 2020-21 season a khel chhunzawm leh a, mahse, a tih thin ang thovin a khel tha leh hle. Tunah hian Copa America 2021 a khel mek a, hetah pawh hian player che tha ber pakhat a ni. Ballon d’Or dawn leh theihna chance a nei thei dawn niin a lang.
Sportskeeda chuan Lionel Messi’an 2021 Ballon d’Or dawn a phu na point 5 an tarlang a, kan rawn tarlang ve leh dawn a ni.
5. Lionel Messi hi 2020-21 season-ah khan Man of the Match dawng hnem ber a ni
Football match khelha player che tha leh thalo enna pakhat chu Man of the Match an thlan leh thlan lohah a innghat thui hle. Lionel Messi hi kum 10 chuang FC Barcelona player pawimawh ber alo ni thin tawh a, Barcelona president thar Joan Laporta’an Messi contract pawhsei sak a tum pawh hi a mak hran lo.
2020-21 season khelh zawh tak chhung khan Lionel Messi hian Man of the Match vawi 22 lai a dawng thei a ni. Man of the Match dawng hnem ber player ani a, pahnihnaah Tottenham Hotspur striker Harry Kane awmin vawi 13 a dawng, pakhatna leh pahnihna hi an inthlau hle.
4. 2021 Ballon d’Or dawngtu tura rinkai ber a hriat loh
Kuminah hian Europe hmun hrang hrang atangin player che tha tak tak an awm nual a, nikum tun ang hunah kha chuan Ballon d’Or dawng tura rinkai ber a hriat, mahse, kuminah erawh dawngtu tura rinkai ber ala hriat tak tak theih loh.
Kan hriat angin 2020 Ballon d’Or chu Covid 19 hrileng avangin cancel a ni, 2020 Ballon d’Or kha sem thei chu nise Bayern Munich tana che tha em em Robert Lewandowski’an a dawn ngei a rinawm.
Kuminah hian Lionel Messi pawhin dawn theihna chance ala nei thei dawn a ni.
3. Lionel Messi hian Copa America khelh mekah Argentina hnehna a chan pui theihin
Copa America 2021 khelh mekah Argentina hi team tha ber pakhat anni. Awlsam takin knockout stage-ah an inhlangkai a, Group A-ah hmahruaitu ann. Group stage match 4 an khelh atangin vawi 3 hnehna an chang a, vawi 1 draw annei.
Copa khelh mekah Messi hian a ram Argentina tan goal 3 a khung mek. Kumin Copa America nomawi a chawi thei a nih ngat chuan Ballon d’Or a dawn leh ngei a rinawm.
2. 2020 ah Lionel Messi a che ropui
2020-21 season chanve vel thleng kha chu duh angin a che tha vak lo. Mahse, December thla tawp vel atang khan a rawn che tha chho tan a, Barcelona tan calendar year-ah match 29 a khelh atangin goal 28 lai a khung a, hei mai bakah assist vawi 8 a nei tling bawk.
Kum 2021-ah Barcelona chu Cope del Rey nomawi a chawi pui a, Copa America khelh mekah Argentina tan goal 3 a khung mek.
1. Lionel Messi’an La Liga Golden Boot a dawng
Season liamtaah khan Lionel Messi chuan FC Barcelona tan La Liga match 35 a khelh atangin goal 30 lai a khung tling a, La Liga player goal khung hnem ber niin La Liga Golden Boot a dawng. Kum 30 chuanga upa ni tawh mahse, goal khung lamah ala duailo hle.
Source Sportskeeda