Lionel Messi chu Barcelona player a ni tawh lova, Nizan khan Barcelona chuan legendary Argentine hian club a chhuahsan tur thu an nemnghet a nih kha.
Rinhlelh rual lovin an player ropui ber a ni, Lionel Messi’an FC Barcelona a chhuahsan dan hi hero tak tak angin a chhuahsan a ni, team in nomawi an chawi theih tur ang zawng zawng a chawi pui mai bakah Catalan club tana hun a hman chhungin mimal chawimawina pawh a dawng hnem ang reng hle. Mahse, Lionel Messi hmalam hun tur erawh ala chiang thei tak tak lo, season tharah hian eng team tan nge a khelh tak ang le tih chu mi tamtak zawhna ani leh ta.
Khawvel club hrang hrangah hian Lionel Messi la thei tur club hi tlemte chauh an awm mai thei, a chhan chu a hlawh hi a tam a ngai dawn. Tun tumah hian Season thara Leo Messi khelhna tura rinkai club 5 te kan rawn tarlang ve leh dawn a ni.
5 Bayern Munich
Lionel Messi la thei tur zingah hian Bayern Munich hi an lang hmasa ber maithei a ni, mahse, Lionel Messi tan zawm theihna chance a tam lem lo. Bayern Munich hian khawvel superstar tha an kawl ve nual a, sum lamah pawh an buai vak lo niin a lang, Bayern Munich hian free transfer in Messi hi an la thei anga, an hlawh tur pawh a pe thei ngei dawn a ni.
Kum tlemte liamta atang khan Bundesliga club lian Bayern Munich hian player upa lam aiin rawlthar player talent nei tha hi an duh zawk tawh a. Mahse, Lionel Messi hi star dang nen chuan a inang lo.
Footballer player ropui ber pakhat a ni, Kum 34 a upa a nih tawh hnu pawhin, amah thawh chhuah liau liau in trophy a chawi thei a ni. Bayern Munich hma tlarah Thomas Muller, Robert Lewandowski leh Lionel Messi te hi awm dun ta se, an bon viau maithei a ni.
4 Manchester United
Premiere League club te hi an hausa ang reng anga, thil tih theihna an nei lian riau, Season tharah Lionel Messi hi England lamah khel pawh nise a mak hran lovang. Man Utd hi football brands lian ber pakhat anni a, khawvel player tha an tih ang hi la lut pawh ni se, hlawh pek lamah chuan buaina an neih a rinawm lo, chutiang bawkin Messi pawh hi la lut ta se, hlawh lamah buaina an neih a rinawm lo a ni.
Lionel Messi’an Manchester United a zawm lai hi, an thenawm elpui ber Manchester City tan chuan en liam a harsat viau a rinawm. Red Devils hian Premiere League nomawi chawi thei turin an squad te an siam tha zel a, hetihlai hian Man City lam pawh an neihsaah an lungawi deuh tawh.
Kum 34 a upa Lionel Messi hlawh hi a tlawm zawkzawk dawn lova, Manchester United in Sancho leh Varane an lak luh tawh avangin Messi hi an la lut tawh lo maithei bawk.
3 Chelsea
Kan hriat angin Romelu Lukaku leh Erling Haaland hi Chelsea lama lut tur angin sawi a awm a, mahse, Lionel Messi lak theih a nih tawh chuan an transfer plan pawh an thlak ve leh a rinawm.
European Champions Chelsea hi player lak luh nan sum an ren vak lo niin a lang, club neitu Roman Abramovich hian Stamford Bridge lamah a player duh a la lut thei zel hi Chelsea bon na pakhat a ni.
Chelsea hian Lionel Messi hlawh turah buaina an neih a rinawm lo, Messi’an Chelsea a zawm a nih ngat chuan Thomas Tuchel squad chu an that viau a rinawm a ni.
2 Manchester City
A hma atang tawhin Lionel Messi leh Pep Guardiola te hi Manchester City lamah an thawk dun leh dawn tih chu thuthang a awm tawh a. Mahse, Man City hian Jack Grealish an la lut tawh a, Jack Grealish hian Leo Messi jersey number hak thin Jersey number 10 a ha hlauh mai, Man City hian Messi hi la lut ta se, Jack Grealish hnen atangin Jersey number 10 hi an pe thei ang em?
1 Paris Saint-Germain
Lionel Messi la lut duh zingah Paris Saint-Germain hi an langsar hle. Mahse, PSG hian suerstar Neymar, Mbappe, Wijnaldum, Ramos te an la lut tawh a, heng ho tan hian hlawh tamtak an pe chhuak tawh, Messi an lak luh leh a, hlawh an pek leh chuan an inseng nasa dawn hle.
Lionel Messi leh Neymar hi khelh dun leh duh deuh mai anni a, Kylian Mbappe’an PSG ah contract thar a sign lo a nih ngat chuan, Messi tan PSG luh theihna kawng zau tak a inhawng dawn a ni.
Source SK