Bayern Munich goalkeeper Manuel Neuer chuan an striker hlui Robert Lewandowski-an an lama goal a khung loh avangin an vannei hle ah a ngai.
Poland international hi a club thar Barcelona tan a che tha nghal hle a, goal kua khung tawh in kar hmasa lam khan Viktoria Plzen lakah a club thar tan hattrick hmasa ber a siam nghe nghe. Nizan Allianz Arena-a a club hlui a hmachhawn tum in erawh Lewandowski hian goal a khung lova, goal khung theihna hun tha nei mahse a vanduai tum a tawng.
2-0 a Barcelona an hneh hnuin Bayern Munich goalkeeper Manuel Neuer chuan a pawlte chu an vannei niin a ngai a, an defender te a fak bawk.
”Lewandowski hi Munich ah a hlawhtling em em a, chuvangin a tan chuan he hmuna inkhelh leh hi game danglam bik a ni. Tunah erawh kan elpui/tumpui a ni tawh a, a tana game pawimawh takah vanneihna a lamah a tang lo hlauh. Goal chunga a pet leh a vawihnihna tha taka ka dang thei kha kan vanneihpui a, kan defender te an khel tha em em bawk” tiin German siban vengtu Neuer an Lewandowski laka goal an chhuah lo chu vannei a in tih thu a sawi.
Bayern coach Julian Nagelsmann pawh in a striker hlui Lewandowski chungchang sawi ve in ,”A khel tha hle in ka hria a, keimah ni lam thlirna atangin erawh goal a khung lo kha kan lawm takzet. A hlauhawm zia kan hria a, kan dang bet thei zel kha a lawmawm hle” a ti.
