Lewandowski aia Dembele tha ti zawk tu Braithwaite

Season hmasa ah goal hma ah vawi tam Barceolona an hriam tawk lova, tun season ah erawh striker tha tak Lewandowski leh a puibawmtu forward te avangin goal an khung thei fu mai.

Barcelona forward zingah Robert Lewandowski leh Ousamane Dembele te’n fak an hlawh zual a, kum 34 a upa Bayern Munich striker hlui hian a club thar tan game 5 a inlan atangin goal 8 a khung tawh. Tin, tun hnaia rawn tha chho tak Ousmane Dembele hian goal khung tur siamsak a thiam hle a, 2022 ah French forward aia assist nei tam chu Lionel Messi leh Kevin De Bruyne te chauh anni.

Tun nipui bazar a Camp Nou chhuahsana Espanyol pantu Martin Braithwaite chuan Lewandowski aia Dembele thiam a tih zawk thu sawiin, “Inkhel mualah Lewandowski aia danglamna thlen tam zawk tu chu Dembele hi a ni” a ti.

Danish forward chuan Dembele chungchang sawi chhunzawmin,”Ousmane hi naupang fel tak a ni a, ka ngaina hle. A theihna leh thiamna hi a sang em em bawk. Messi chu sawi ngailo nise Ousmane ang player hi ka la hmu ngailo” a ti.

Kum 34 a upa Lewandowski chuan kum tam tak chhung khawvela a tha ber te zinga mi anih zia a pholang tawh a, chutihlaiin kum 25 a upa Dembele erawh a tha ber te zinga mi ni turin hna tam tak thawh tur a la nei thung.

Club laka lungawilo nia kan ngaih Braithwaite chuan a chungchang thu media te chhuah chu a dik lo thu sawi leh in,”Mipui te hian engmah an hre love, ka chungchanga thua media te thuchhuah an chhiar a, mahse an thil tarlan te kha a dik tawk lo. Thil kal tawh sawi chhen ka tum lova, tuna ka hun tawn mekah hian ka hlim” a ti.

Related Posts

error: Content is protected !!