Lionel Messi pa Jorge Messi chuan a fapa Lionel Messi chu Spanish club ropui Barcelona tana a inkhelh leh tawh a rin loh thu a sauwchhuak.Barcelona captain hlui Lionel Messi hian 2021 khan club sum dinhmun chhiatluat avangin Camp Nou a chhuahsan a, Ligue 1 club hausa Paris Saint Germain chu free transfer in a zawm.
Ligue 1 champion tan hian a season hman hmasak ber ah beisei pha lo mahse tun season ah erawh a form a nei kir leh tawh a, PSG tan inelna hrang hrangah goal 15 leh assist vawi 14 a thawkchhuak tawh.
Kum 35 a upa hian tun season bak Parc des Princes ah contract a nei tawh lova, contract thar a ziak dawn em tih hriat chian theih a nilo bawk. Argentine captain hi MLS club Inter Miami, Saudi Arabian club Al Hilal leh a club hlui Barcelona te nena sawizawm anni.
Report thenkhat te’n Messi chu a club hlui Camp Nou a kir leh tur ang in an tarlang a, amaherawhchu Messi pa leh a agent ni bawk Jorge Messi erawh in a fapa chu Camp Nou-a a kir leh a rin loh thu a sawichhuak.
”Leo (Messi) hi Barca tana a inkhelh leh tawh ka ring lo. Laporta (Barca President) nen inbiakna kan nei lova, eng offer mah kan dawng bawk hek lo” tiin Jorge Messi chuan a sawichhuak.
Ni tlem te liamta khan Messi unaupa Matias Messi chuan Barcelona chu Lionel Messi vanga mi tam tak hriat anih thu a lo sawi tawh a, Barca tana Messi pawimawhna chu tun ai nasa in Barca lam hian hria se a duh a ni ber. Messi chhungkaw lam hian Barca nena thawhdun an duh tawh lo pawh a ni maithei bawk.
Camp Nou ah Messi kir tawh dawn lo mahse club legend a ni reng tawh dawn a, Argentine superstar hian Barca kawr haa match 778 a inlan atangin goal 672 teh meuh a khung a ni!