Leicester City an hneh hnuin Manchester United in table chung ber luah mek tu Arsenal an hnaih zel a, chutihrualin manager Erik Ten Hag erawh in Premier League title lam an la ngaituah loh thu a sawichhuak.
Premier League inkhelah Manchester United leh Leicester City te chu Old Trafford ah an insu a, Ten Hag nau te hian 3-0 a hnehna changin point 3 hlu tak an hlawhchhuak a, league title beiseina mei an chhi alh zel. Red Devils tan Marcus Rashford chuan goal hnih a khung a, Jadon Sancho an goal khat a thawh ve bawk.
Inkhelh banah Dutch coach Ten Hag chuan league title lam an rilru ah a la awm loh thu hetiang hian a sawichhuak,” League title lam kan la ngaituah lova, naktuk hun tur kan ngai pawimawh zawk. Keimahni theuha a tha ber nih kan duh a, chu chu kan thawhrim chhan pawh a ni. February thla chauh kan la hmang a, hma hun thui tak kan la ngaituah lem lo” a ti.
Erik Ten Hag hnuaiah Manchester United an form em em a, league game 24 atanga point 49 hmu tawhin table ah 3-na anni mek a, pakhatna a awm Arsenal chu point 5 bak in an phak tawh lo.
Red Devils game leh tur hi Europa League knockout round play off 2nd leg niin an khelmual Old Trafford ah Spanish league hmahruaitu Barcelona an lo mikhual ang. Barcelona an hmachhawn zawh hian Newcastle United nen February ni 26 ah Carabao Cup an inchuh dawn a, Wembley Stadium ah match hi khelh a ni ang.
2017 hnua title la chawi leh miah lo Manchester United hi tun season ah heng inelna Europa League, EFL Carabao Cup leh FA Cup ah te an tling vek a, league lamah nise beisei tur an la nei cheu bawk. Season tawp ah trophy pakhat tal an chawi kan beisei em?
