League ah Manchester City an champion anih chuan Portuguese full back Joao Cancelo an lawmpui ngei a tum a, season tawp rualin England ah a kir leh maithei bawk.
Spanish manager Pep Guardiola hnuaia a inkhel tlem deuh avangin Cancelo hian January transfer window inkhar ni khan loan in German champion Bayern Munich a zawm a, Bavarians hian an duh anih chuan season tawp ah euro 70 million in an la nghet thei ang. Kum 28 a upa hian Etihad Stadium ah kum 2027 thleng daih tur contract a la nei a, England-a a zinkawng zawh hi a la tawp lo maithei.
Tun hnaia an kawmna ah Cancelo chuan Man City a a teammate thenkhat te a fak a, season tawp ruala England a kir leh thei tur anih thu a sawichhuak.
Cancelo chuan,”City in league title an chawi anih chuan ka lawmpui ang maw? Aw, ka lawmpui ngei ka beisei a chhan chu ka chhungkaw pahnihna an nih avangin.”
”Bernardo Silva hi ka thian tha ber te zinga mi a ni a, City a ka mi ngaih ber a ni. Ka rilru lam daktawr (psychologist) a ni ber a, eng harsatna pawh tawk ila a hnenah ka thlen mai thin. Ruben Dias pawh hi ka nel em em a, amaherawchu Bernardo Silva ang em chuan kan inlaichinna a thuk lo. Silva nen hi chuan kan inpawh hle a, a bikin inkhel mualah kan inman hle bawk. Ani hi damchhunga hun ka hman pui peih tur mi a ni”
”England ah chuan City ka tan ber a, title an chawi anih chuan England leh Germany ah title ka lawm ve ve thei dawn tihna a ni mai. Riyad Mahrez pawh hi ka thian tha tak a ni a, nikhat lek pawh ka hming lam lovin a awm ngai lo. Jack Grealish hi mi danglam bik a ni a, Nathan Ake pawh football a mi tha ber te zinga mi a ni.”
”City hi pawl danglam bik anni a, ka thawhpui tawha team tha ber anni. Inthianthatna nasa tak ka chhar a, season tawp rualin ka kir leh maithei bawk.”
Cancelo hi Julian Naglesmann enkawl hnuiah a insiamrem hma hle a, Bayern Munich tana game 5 a inlan atangin assist vawi 2 a thawkchhuak tawh. Nipui bazar ah Bayern in Benjamin Pavard an hralhchhuak anih chuan Cancelo hi a ngheta an lakluh ngei pawh a rinawm.