”Kum hmasa lamah he league hi ka lo pan teuh tawh hle thin” – Perisic

Tottenham Hotspur left wing back Ivan Perisic chuan hun liam ta a Premier League club lian pahnih Manchester United leh Arsenal te a lo zawm teuh tawh thu a sawi.

Kum 33 a upa hian Inter Milan a a contract neih lai a hman zawh hnuin a pu hlui Conte enkawl Spurs chu tun nipui transfer bazar khan a zawm a, Croatian wing back hian Europe club lian thenkhat Bayern Munich, Borussia Dortmund, Inter Milan leh Wolfsburg tan te a lo inkhel tawh.

Perisic chuan Spurs a zawm hmaa Man Utd leh Arsenal te a lo zawm hman tep thu sawiin, ” Premier League a ka inkhel thei tur hi ka phur hle a, kum tam tak liam ta atang tawh khan he league a inkhelh hi ka chak hle thin, amaherawhchu engemaw harsatna avangin kan tipuitling theilo ziah. He hmuna inkhelh hi ka chak tawh hle a, kum hmasa lamah he league hi ka lo pan teuh tawh hle thin. 2017 ah Manchester United ani a, 2019 khan Arsenal ani bawk. Tin, Premier League club dang thenkhat min duh tu pawh an awm ngei mai amaherawhchu engkim tihfel dawn ruai ah harsatna engemaw tak a lo awm zel thin. Tunah erawh hun kal tawh thlir let a hun lova, season thar lo awm tur ah hian rilru zawng zawng ka pek a ngai” a ti.

Perisic hian season hmasa khan Inter Milan tan game 48 inlan in goal 10 leh assist vawi 9 a nei. A team hlui Inter chu manager Antonio Conte kaihruaina hnuaiah 2020-21 season khan Serie-A nomawi a lo chawipui tawh bawk.

Related Posts

error: Content is protected !!