Premier League ah hian rawlthar beiseiawm tak tak lo chhuak an awm fova, chung rawlthar te chuan kum 21 an tlin hma hauh pawh in goal leh assist an nei nual tawh thin. Tunah chuan Premier League chanchin a kum 21 tlin hmaa assist nei hnem zual player pali te i han thlir ho teh ang:
4.Bukayo Saka (18 Assist) : Arsenal forward thangduang tak Saka hian 2019 January thla khan manager Unai Emery hnuaiah Arsenal first team tan a inlan tan a, tun thleng hian Gunners tan league game 103 inlan tawh in kum 21 tling hlim hian Premier League ah vawi 18 assist a nei tawh.
3.Michael Owen (18 Assist) : Owen hi a hunlaia English rawlthar beiseiawm ber ti ila kan sawisual tam lovang. Liverpool tana a game hmasa ber chu 1997 May thla khan kum 17 chauh a upa niin a a khel a, goal a khung nghe nghe. A goal khung theih mai piahlamah assist a nei thei em em bawk. 2001 a Ballon d’Or chawimawina dawngtu hian kum 21 a tlin hma in Premier League assist vawi 18 a nei tling tawh.
2.Wayne Rooney (22 Assist) : Premier League chanchina goal khung tam ber pahnihna Rooney hian assist lam pawh a thei fu mai. Everton tan kum 17 chauh a upa niin 2002-2003 season khan a inlan tan a, a thiamna leh theihna te hmu a hretu Sir Alex Ferguson chuan 2004 nipui bazar khan a lalut. Rooney hian Man Utd tana season hmasa pathum a khelh atangin league ah assist vawi 26 a nei hman a, kum 21 a tlin hma in Premier League assist 22 a nei.
1.Cese Fabregas (38 Assist) : Cese Fabregas hi Premier League chanchina rawlthar hmuhnawm ber te zinga mi anni chiang. 2004 khan kum 17 chauh a upa niin Arsenal tan a inlan tan. Arsene Wenger hnuaiah hma a sawn chak em em a, Premier League a playmaker tha ber pawl a ni phak. Spanish midfielder kum 35 a upa hian kum 21 a tlin hma in Premier League ah assist vawi 38 a nei tling hman. Amaherawhchu vanduaithlak takin Arsenal tan nomawi a chawi lo!
