Germany legend Jurgen Klinsmann chuan Toni Kroos chu player tha tak anih thu leh Real Madrid tana season 4 dang a la khelh theih tur thu a sawi.
Kroos hian Real Madrid tan season 9 chhung hun a hmang tawh a, game 395 inlan tawhin trophy pawh 18 ngawt mai a chawi tawh a, chung zingah chuan UEFA Champions League 4 a tel nghe nghe.
Kum 33 a upa hi tun season ah pawh Los Blancos player rinrawl ber te zinga mi a la ni a, Real Madrid game 34 atangin game 26 ah inkhelh bul a tan a, ani (Kroos) aia match start tam zawk chu Federico Valverde (29 games) leh Vinicius Junior (32 games) te chauh anni.
Kroos hian Santiago Bernabeu ah tun season chhung bak contract a nei tawh lova, contract thar ziah a hmanhmawh lo nia sawi a ni bawk. German midfielder hian club dang zawm tumna a neihloh thu leh Real Madrid a retire a duh thu a lo sawi tawh nghe nghe.
German legend Klinsmann chuan Kroos chu Madrid tana kum engemaw ti chhung player pawimawh a la nih theih tur thu hetiang hian a sawi, “Tun kum 10 emaw 15 liamta chhunga a hlawhtlinna chan zo zai te hi a ropui hle. Engkim a chawi tawh a, eng zah chiaha tam nge a chawi tawh tih pawh ka hre lo.”
“Player tha bik a ni a, Real Madrid tan hian minute 90 mai nilo minute 120 thleng tha tho takin a khel thei thin. Tun atanga kum 3 emaw 4 chhung chu Real Madrid tan hian awlsam taka a la inkhelh thei ka beisei a, chu mai bakah club lama insawrbing a duh avangin German National Team atang pawhin a retire hma hle anih kha. Kum tam a la inkhelh theih ka beisei a, hma taka inkhelh a chawlhsan mai chuan a tan pawh a manganthlak dawn hle a ni” a ti.
