Player lakluh thar te nen khelmuala tun aia an inman hunah khawvela team tha ber pakhat an la nih tur thu Chelsea defender Reece James chuan a sawi.
Blues hian January transfer liamta khan player thar chawkluh nan £294.8 million lai an inseng a, Enzo Fernandez chu player lakluh to ber niin Argentine rawlthar hi Premier League history a signing man to ber a ni nghe nghe.
Fernandez mai bakah Mykhailo Mydryk, Benoit Badiashile, Andrey Santos, David Datro Fofana, Malo Gusto, Noni Madueke leh Joao Felix (loan) te pawhin Stamford Bridge an pan ve bawk.
Blues hian player thar lalut nual mahse kuminah match khat ah chiah hnehna an la chang a, an defender James chuan team player te an khelh ho tama, tawnhriat tam zawk an neih hunah chuan khawvela team tawhkhirh ber te zinga mi an nih theih a beisei.
“January hun hi a buaichuar em em a, game khelh tur a tam mai bakah transfer thawmthang a awm reng bawk a, thlakhat chhunga thil chinfel tur hi a tam lulai deuh a ni. Chuvangin mite’n engtin nge min ngaih tih ah hian ka buai lutuk lem lo” tiin England international James chuan a sawichhuak.
Kum 23 a upa chuan sawi chhunzawmin,” Player thar te nena khelh ho hi nuam ka ti hle a, an lak atang hian eng ang chiaha beisei san tur nge in hre lo maithei. He khawvel hmun hrang hrang atanga lo kal khawm anni a, a tum ber chu he team tanpui a ni. An insiamrem hma poh leh team an pui hma thei tihna a ni mai.”
“Trophy kan chawi theihloh tur hi a awm in ka hre lova, engtik ah nge chu chu a thlen dawn tih pawh ka hre lo. Team intungding mek kan ni a, player naupang zawk te nen, kan khelh ho tam hunah leh tun ai nasa zawk tawnhriat kan neih hunah chuan khawvela team tha ber pakhat kan la ni dawn” a ti.
Chelsea hian tun season ah league game 22 an khelh atangin point 31 an hlawhchhuak tawh a, table ah 10-na anni mek. An league game leh ah Southampton an mikhual dawn a, point 3 hmuh ngei an tum ang. Graham Potter nau te’n league title chawi an inbeisei a rinawm tawh lova, top 4 huanga season khar erawh an tum ngei ang.