Liverpool manager Jurgen Klopp chuan Anfield a chhuahsan loh tur thu leh a hna ah 100% a inpumpek thu a sawichhuak.
Reds in season duhawm lo tak an hmang mek a, season kal mek ah league game 20 an khelh atangin point 29 chauh la hlawhchhuakin table ah 10-na anni mek.
Fans tam tak chuan 2026 thleng Anfield a contract la nei tu Jurgen Klopp chu a chet that tawk loh avangin club a chhuahsan mai an ring a, amaherawhchu heng an ngaihdan hi a dik lo hulhual.
Klopp chuan Liverpool chhuahsan mai a la tum loh thu hetiang hian a sawi,” Mipui lam pawhin ka laka rilru an put dan tur ka hrethiam a, amaherawhchu khawiah mah ka kal bo dawn lova, chhuak thei lah ka ni hek lo. Mawhphurna lian tak ka nei a, ka hmachhawn duh a, kan buaina hi tihkian ka tum.”
”Hun harsa tak kan tawk mek a, keipawhin kan hun tawn mek hi nuam ka ti fahran lo, amaherawhchu hun harsa lai ber pawhin club danglam bik kan nih zia kan lantir thei a, chu chu beiseina kan neih tlat in leh mipuite’n ka laka rinna an nghah ngam in a ni. Chutiang thil kan thlentir thei anih chuan kan harsatna hi kan paltlang ang a, hun ropui tak tawng ngei ang.”
“He hmuna ka hna ah hian 100% rilru ka pe a, hnehna kan chang anih chuan tlemte a inhnamhnawihna ka nei ve nimai hian ka hria. Kan chakloh tumin erawh 100% ka thiamloh niin ka ngai thung. Chuvangin tuna ka mawhphurna san zia in hriatthiam ka ring a, kan buaina zawng zawng pumpelh turin leh he club a thil tha thlen turin engpawh ka ti dawn a ni” a ti.
Reds hian zanin zanlai / zinglam dar 1:30 hian Everton chu Anfield ah an lo mikhual dawn a, Merseyside derby hmuhnawm tak a ni ngei ang. League table 18-na a Toffees an zuamawm ngawt bik lova, manager thar Sean Dyche hnuaia an phur vanglai niin an game hnuhnung berah pawh league hmahruaitu Gunners chu sikhat faiin an hneh anih kha.