Premier League match a Everton an sawp hnuin Arsenal manager Mikel Arteta chuan a nau te chu league title inchuh kawngah la inthlahdah mai lo turin leh hma sawn chho zel turin a duh.
League a hmahruaitu Arsenal hian nizan khan Emirates Stadium ah Everton an lo mikhual a, mual neitu lam atangin Gabriel Martinelli an goal hnih a khung bakah Bukayo Saka leh Martin Odegaard te chuan goal khat ve ve an thawh ve bawk.
Mikel Arteta leh a nau te’n Tofees lakah point 3 hlu tak hlawhchhuakin league table ah pawh champion lai leh tuna pahnihna a awm mêk Manchester City chu point 5 laiin tlan pel tawh mahse Arteta erawh in a nau te chu ngaihtha taka an awm a duh lova, tun aia an khelh that zawk theih a la beisei cheu.
‘Everton in sawp hnu hian league title chawi thei turin in dinhmun a tha zual sawt em?’ ti a reporter zawhna Arteta chuan chhangin, ” Ka chhanna tur chu i hria e. Ka duh em em mai chu a tu mai pawh kha kan thil tum hlenchhuah kawngah an phur em em a, chu chu kan bansan lo dawn lova, kan chhawmnung zel bawk ang.”
Gunners boss chuan sawi chhunzawmin,”Hma kan sawn theih zel dan tur kan ngaituah a ngai a, chumi tur chuan kan game khelh dan kan ennawn a ngai thin. Thil tam tak kan siamthat a ngai a, a bîkin first half a kan khelhdan atang te khan hma sawn kan la ngai hle a ni.”
“Kha aia khel tha thei tur kha kan ni a, chuvangin kan game leh tur atan tha taka kan inbuatsaih chho tan nghal a ngai. Bournemouth kan hmachhawn dawn a, game harsa tak kan hma bak a ni” a ti.
Gunners hian season kal mêk ah league game 25 atanga point 60 zet hlawhchhuak tawh in table chung ber an luah chhunzawm zel a, 2004 hnua Premier League title chawi leh turin kawng dik an zawh mêk zel.