Manchester City defender Kyle Walker chuan Nottingham Forest an inhnehtawk pui hnuin an chet dan a duh khawp lo hle a, kha aia khel tha tur zawk an nih thu a sawichhuak.
City hian Arsenal an hneh hnuin league table chung ber an luah zui a, amaherawhchu Forest an inhnehtawk pui avang leh an intlansiak pui ber Arsenal an chak bawk avangin Pep a nau te hi league table pahnihnaa an awm leh a tul.
Nizan inkhelah Bernardo Silva chuan minute 41 na ah City hmahruaina goal a khung a, Wood chuan Forest tan minute 84 na ah an siphurh hi a sut. City chuan Forest lakah shot vawi 24 lai nei mahse goal khat bak an khung lova, goal hma ah Erling Haaland leh a thiante an hriam tawk lo.
Inkhelh banah Walker chuan an game khelhdan a duhkhawp lo hle a, kha aia khel tha zawk khel tur an nih thu hetiang hian a sawi,”A hmasa berah chuan Emirates ah kan lenglut a, kan duh ang ngei kan thlentir, chuan he hmun (City ground) kan rawn pan leh a, kan chet dan erawh pawm zam mai mai theih a nilo. Table chung lama awm te elphâk kan duh chuan hnehna kan chan chho mawlh mawlh a ngai. Kan hun tha neih kan bawhpelh nual a, team anga kha aia khel tha zawk tur kan ni.”
”Game zawng zawng hi inang khat veka kan thlir a ngai a, cup final ang mai a theihtawp kan chhuah vek a pawimawh. Zanina kan khelhdan ah khan enge sawi theih ka neih? Kan chet dan kha pawm zam mai mai theih tur a nilo. Nottingham Forest lam khan fak an phu a, an inveng tha takzet! Keini lam erawh kha aia khel tha tur kha kan ni”a ti.
Champion lai City hian season kal mek ah league game 24 an khelh atangin point 52 an hlawhchhuak tawh a, table ah 2-na anni mêk. Pep-a nau te hian game khata khel tam zawk chungin league hmahruaitu Arsenal chu point 2 in an phak lo mek bawk. City hian an game leh ah RB Leipzig chu UEFA Champions League Round of 16 1st leg ah an hmachhawn dawn a, match hi Nilai zanlai dar 1:30 a khelh a ni ang.
