Keini aiin Arsenal an tha zawk – Pep

Tun season ah Manchester City in bul tan tha viau mahse Arsenal chu a team enkawl mêk aia an that zawk thu City boss Pep Guardiola an a sawi.

Nipui bazar a Manchester City pantu Erling Haaland an game 12 a inlan atangin goal 19 a khung tawh a, City chu Premier League chawi leh tura mi tam tak rinkai anni. Tun season kal mêk ah City in hnehloh an la tawng lova, tum hnihah erawh an khingpuite an inhnehtawk pui.

A nau te’n bul tan tha viau mahse Pep Guardiola erawh in Premier League nomawi inchuh kawngah league hmahruaitu Arsenal an that rih ber thu a sawichhuak.

Pep chuan,” Season tin hian engti kawng zawng emaw tal chuan hma kan sawn zel. Tunah hian league game 8 chauh kan la khel a, chuvangin enge thleng zel dawn a la hriat loh. A pawimawh ber chu kan tum ang takin Premier League leh Champions League ah bul kan tan tha a, last 16 inhlangkai turin game khata hnehna chan chiah kan mamawh tawh. Chu chu hlen chhuah ngei pawh kan tum bawk”.

“Premier League lamah pawh bul kan tan tha a, amaherawhchu kan theihnghilh loh tur chu keini aia team tha zawk pakhat an awm. Mipui zawng zawng te u, tun thlengin Arsenal hi keini aia team tha zawk anni. Chu chu thil nihna dik tak a ni. Table chung ber kan luah lova, a pawimawh ber erawh luah tuma theihtawp chhuah a ni” a ti.

League table pahnihna a awm Manchester City hian inrinni zan dar 7:30 ah Southampton an mikhual dawn a, Saints lakah point 3 an hlawhchhuak ngei a rinawm. Table chung ber luah mêk tu Arsenal ve thung hian Pathianni zan dar 9 ah tun hnai che tha hleithei lo Liverpool an mikhual dawn a, inkhel hmuhnawm tak an chhawpchhuah beisei ang.

error: Content is protected !!