Manchester United in si sarih fai zeta an hmelma hlun Liverpool laka an mualpho hnuin club legend Roy Keane a zak chem chem hle a, an hunlai nise thla engemaw chhung a bikbo tur thu a chhâkchhuak.
Nizan Premier League inkhelah Liverpool leh Manchester United te chu Anfield ah an inhmachhawn a, Klopp leh a nau te hian tun hnaia che tha leh Carabao Cup chawi hlim Manchester United lakah zahngaihna chhe tê mah lantir lovin goal 7 zet an lo pe!
He match hi Man Utd tlawm nasat ber tum niin manager Erik Ten Hag leh player te mai bakah club legend thleng tan pawh a mualpho thlak hle a, nizan zet zawng Man Utd history a zan duhawm lo ber te zinga mi a ni chiang e.
7-0 zet a an hmelma Liverpool an ngamloh hnuin Man Utd legend Roy Keane chuan a mualpho thlak zia hetiang hian Sky Sports a hrilh,” 6-0 emaw 7-0 in chak lo ta ila thla engemaw ti chhung chu ka bibo ngei ang. Chutiang khawpa mualpho thlak chu a ni a, kan tan ni lungchhiatthlak tak a ni. Half time hnu hret khan match a tawp ti ila a sual awm lo ve, senior player te kha an che chhe lulai êm a, team kaihhruai tumna an nei lo. Goal an chhuah dan mawlh te kha a manganthlak a, United tan chuan ni duhawm loh tak a ni. Hetiang khawpa team dang in a an sawp theih tun Man Utd team a ka tel lo hi Pathian hnena lawmthu sawi na tham a ni!.”
“Player te kha an hrilhai hle a, an khelhdan avang khan an zak ngawih ngawih ve ngei ang. Team in hun harsa tak an tawh in player a tu a mah kha an penchhuak ngam lo a ni. Goal hniha kan hnufual pawhin chhanlet ngei kan tum tur a ni a, keimahni a inrintawkna, tumna leh beihlet duhna a awm tur a ni. Amaherawhchu zanin khan Man Utd player te atangin khatiang thil kha hmuh tur a awm lo” a ti.
Manchester United hian Premier League a an hnehloh zin ber team chu tudang nilovin an hmelma kumhlun Liverpool anni a, Reds lakah Red Devils hi league match 19 zet ah an tlawm tawh! Tin, Manchester United hian league a Liverpool an hmachhawn hnuhnung 5 ah te goal 21 lai mai an chhuah bawk.
Nizana Man Utd captain armband hrêngtu Bruno Fernandes chuan dem a hlawh hle a, ani bakah defender pahnih Luke Shaw leh Raphael Varane te pawh sawisel hlawh nasat zual anni.
Erik Ten Hag leh a nau te game khelh leh tur hi UEFA Europa league round of 16 first leg niin Spanish club Real Betis chu Old Trafford ah an lo mikhual dawn a, hnehna chan a insiamthat nasat an tum ngei ang le.