Bruno Fernandes chuan season tharah amah in nge Mason Mount an number 10 role play dawn a hre bik lova, manager Erik Ten Hag pawhin number 10 role tuin nge play dawn a la sawi chiang lo.
Team captain atana ruat thar Fernandes hi Erik Ten Hag hnuaia number 10 role play tura player rinrawl ber a ni a, hetih mêk lai hian Chelsea tana number 10 role play thin Mason Mount an kuminah £60 million in Red Devils a rawn zawm ve bawk.
Player pahnihte hi attacking midfield, centre midfield leh a sir lama che tla thei an nih avangin season thara an position khelhna turah eng harsatna mah a awm in a rinawm lova, Ten Hag an a chingfel thuai ang.
Number 10 role chungchanga reporter zawhna Fernandes chuan hetiang hian a chhang,”Hemi chungchang hi kan la sawi chhin lova, manager thutlûknaa innghat a ni. Kan pahnih hian position hrang hrang ah kan khel kual thei. Kum hnih liamta khan Mount hi khatih hunlaia Premier League player tha ber te zinga mi anih thu ka lo sawi tawh a, player tha tak anih avangin he hmunah pawh hian hna tha a thawh chhunzawm zel ka beisei. A la naupang em em a, kawng thui tak zawh tur a la hmabak” a ti.
Portuguese international chuan sawi chhunzawmin, “He hmuna kan nei thei hi kan lawm hle a, number 10, 8 emaw wing ang pawhin kan pahnih hian kan khel thei ve ve. A pawimawh ber chu hlawhtling tura kan team tanpui hi a ni” a ti.
Man Utd hian tukin khan kumina an pre season game 4-na khel in Spanish club Real Madrid an hmachhawn a, NRG Stadium ah Ten Hag leh a nau te hi 2-0 in an tlawm.
Red Devils hian an pre season game leh ah German club Borussia Dortmund an hmachhawn dawn a, match hi July ni 31 zinglam dar 6:30 a khelh tan a ni ang.