Kane leh Skipp te goal hmangin Spurs in Chelsea an hneh

Premier League inkhelah Tottenham Hotspur chuan an khelmual Tottenham Hotspur Stadium ah Chelsea an lo mikhual a, mual neitu lam hian hnehna changin point 3 hlu tak an hlawhchhuak.

Spurs lam atangin Oliver Skipp chuan second half minute 46 na ah goal hmasa zawk a khung a, Harry Kane an minute 82 na ah goal hnuhnung zawk a khung ve bawk.

Spurs hian season kal mêk ah league game 25 atanga point 45 hmu tawhin table ah 4-na anni mêk a, season thara Champions League khel turin dinhmun tha ah an ding mêk.

Hetih mêk lai hian Chelsea erawh in league game 24 an khelh atanga point 31 chauh la hlawhchhuakin table ah 10-na an la ni chhunzawm zel a, top 4 huanga season khar turin an hna a hautak chho hle dawn.

Graham Potter nau te hian Premier League game hnuhnung 15 ah tum hnih chiah hnehna an chang a, attacker nei tha viau anga lang si hian an game hnuhnung paruk (all competition) ah goal khat chiah an khung!

Blues ngam loh Spurs hian an khelmual a league game hnuhnung 3 ah te hnehna an chan vek piahlamah goal khat mah an chhuah lo bawk a, record duhawm a ni.

Tottenham hian Premier League a Chelsea an hmachhawn hnuhnung match 8 (2 draws 6 losses) a hnehna an chan theihloh hnuin zanin khan hnehna an chang thei ta a, November 2018 hnua league a Chelsea an hneh leh hmasak ber na a ni.

Chelsea hian an league game hnuhnung 12 ah goal 6 chiah an khung a, nikum November thla atanga chhiarin Premier League ah Chelsea aia goal khung tlem team an awm lo.

Tottenham Hotspur game leh tur hi FA Cup 5th round niin Sheffield United an hmachhawn dawn a, Chelsea lam erawh league game niin an khelmual Stamford Bridge ah Leeds United an lo mikhual thung ang. He match ah hian English manager Graham Potter chuan Chelsea a la enkawl chhunzawm zel dawn em kan hria ang chu.

error: Content is protected !!