Bayern Munich star Thomas Muller chuan Harry Kane leh Bayern te sawizawm annih chungchangah a ngaihdan a sawi a, England captain chu eng club pawhin a an duh tur thu a sawi.
Bayern Munich in 2021 a Robert Lewandowski an chan hnuin forward lalut ve bawk mahse tun thlengin number 9 role play thei striker thar an la sign lova, duh anga season hmasa an hman that tawk loh chhan pawh top class striker an kawl loh vang nia ngaitu an tam hle.
Kum 29 a upa Kane an Tottenham Hotspur Stadium ah season khat bak contract a nei tawh lova, kumin nipui bazarah Bayern Munich chuan Kane hi sign tumin tan an la mek a, an bid hmasa ber £60 million hnawl anih hnuin bid thar theh luh leh an tum mek.
Tottenham chairman Daniel Levy chuan Kane manah hian £100 million lai mai a phut nia report a ni a, hetih mek lai hian report thenkhat erawhin Kane chu Spurs in hralh an tum loh thu an tarlang thung. Engpawhnise England legend hian a club tan thla 12 bak contract a nei tawh lova, a hma hun zel tur kan hre thuai ang.
Kane leh Bayern te sawizawm annih chungchangah German legend Thomas Muller chuan a ngaihdan hetiang hian reporter a hrilh, ”Thil hi a thlen fel hma chu han sep rawtui chiam hian tangkaina a nei in ka hre lova, amaherawhchu Kane chungchang kan sawi anih chuan ani duh lo tu club hi an awm âwm ka hre lo” a ti.
Kane hian season hmasa khan Spurs tan league game 38 a inlan atangin goal 30 leh assist vawi 3 lai mai a thawkchhuak a, Premier League goal khung tam lama a phak loh awmchhun chu Erling Haaland (36 goals) chauh a ni nghe nghe.
Haaland a che tha emai a, Kane a hming in sawi a hlawh tawk lo te pawh kan ti thei awm e. Team talbuai mek Spurs tana season khata goal 30 khung hi a namai lo hle a, top class striker tan lo chuan han tih theih tur chi ziazang hi a nilo!