Manchester United legend Gary Neville chuan Tottenham Hotspur striker Harry Kane an trophy a chawi duh anih chuan Manchester United zawm ngei se a duh.
England captain hian a career zawng zawng Spurs tan a la hmang a, 2021 khan Manchester City zawm duh hle mahse Spurs lamin an chelhbeh tlat avangin a chhuak lo.
Kum 29 a upa hian Tottenham ah kum 2024 thleng bak contract a nei tawh lova, contract thar a ziak dawn em tih hriatchian a nilo. Sky Sports pundit Neville chuan Kane hian trophy chawi turin Man Utd lam pan ngei se a duh hle.
Neville chuan, “Harry Kane hian trophy a chawi duh ngei ka ring a, a khelh mek na club a chhuahsan dawn anih chuan tun hi a hun tur tak a ni. Player tha tak a ni a, club a chhuahsan anih chuan Manchester lam a pan thei ang; City emaw United. Erling Haaland vang hian City lam a pan kher a rinawm lova, United erawh in striker lakluh an duh takzet.”
”Chelsea hi a pan ka ring lova, a chhan chu Tottenham tana hun rei tak a lo rinawm tawh vangin a ni. Chelsea leh Tottenham hi club inhal tak anni a, Chelsea hian centre forward mamawh viau mahse Kane erawh an lakluh theih ka ring lo. Arsenal lam pawh club inhmelmakna avangin a pan ka ring lova, chuvangin tun nipui bazar inhawn hunah Man Utd hi a tana hmun duhthusam ber a ni.”
”Bayern Munich nen pawha sawizawm anni a, Daniel Levy hian ram pawn lama chhuahtir hi a duh mah zawka ka rin avangin he transfer hi thleng ve thei tho a ni bawk. A tawp berah chuan Kane hian trophy a chawi duh anih chuan Tottenham a chhuahsan a tul a, a chhan chu a duh ang tihpuitlin an harsat vang a ni” a ti.
Tun season ah pawh Kane a form leh em em a, Spurs tan Premier League game 25 a khelh atanga goal 18 khung tawh in Erling Haaland che tha viau lo phei se chu tun ai nasa in Kane hming hi kan lam ri ngei ang.