Paris Saint Germain chuan Tottenham Hotspur striker Harry Kane an ngaihven mêk a, a man tur £85 million bid an theh lut dawn niin report chuan a tarlang.
RMC Sport tarlan danin Kane hi PSG top target a ni a, London ah Kane transfer chungchang sawi turin PSG hotute chuan Spurs Chairman Daniel Levy an hmu dawn.
Bayern Munich chuan Kane hi an lo dawr tawh a, a mana tura an bid theh luh vawi hnih £60 million leh £70 million te erawh hnawl a ni. German champion hian England captain hi an la dawr chhunzawm zel dawn a, hetih mêk lai hian sum lama buai lo tak Ligue 1 champion Paris Saint Germain pawhin Kane hi lâkluh ngei tumin tan an la.
England captain hian PSG ai chuan Bayern lam a pan duh zawk in a rinawm a, May thla daih tawh khan Bayern head coach Thomas Tuchel chuan Allianz Arena lama insuan turin a lo hmin tawh a ni âwm e.
Club lian dangte’n Kane hi lâkluh duh viau mahse Spurs chairman Levy erawh in a striker chhuanvawr hi man tlawm taka chhuahtir a tum hauh lova, kum 29 a upa leh club a season khat bak contract nei tawh lo manah hian £100 million a chhiar nia sawi a ni.
Club lian thenkhat nena sawizawm annih mêk karah Spurs lam pawhin an striker hi la kawl chhunzawm zel an duh a, contract thar ziahpuia kartin £4,00,000 hlawh pek an inhuam! Kane hian tun dinhmunah kartin £2,00,000 a hlawh mek a, Spurs ah contract thar a ziah chuan a hlawh hi a let thawk in a pung dawn tihna a ni.
Engpawhnise Kane transfer chungchang a ngaihnawm chho zel dawn a, pre season training nei turin kir leh tawh mahse transfer bazar inkhar nan ni tam a la awm avangin a hma hun tur hi sawi lawk theih a ni ngawt lo.
Spurs head coach thar Ange Postecoglou chuan Kane chu striker ropui ber te zinga mi niin la chelh zel pawh a duh ngei a, chutihrualin a hma hun tur a hriat bik loh thu a sawi.