Manchester United in Europa League Round of 16 first leg a an khingpui Real Betis an sawp hnuin manager Erik Ten Hag chuan team player te a fak a, team in an ze dik tak an chhuah niin a ngai.
7-0 zeta Liverpool laka an mualpho hnuin Man Utd chuan result duhawm hlawhchhuah ngei tumin tan an la a, Old Trafford ah Betis lo mikhual in 4-1 in an tukdawl. He match ah hian Rashford, Antony, Fernandes leh Weghosrt te chuan Red Devils tan goal khat theuh an khung a, mikhual lam atangin Ayoze Perez an goal khat a khung ve hram bawk.
Inkhelh banah Man Utd boss Ten Hag chuan hetiang hian a nau te a fak, “Kan kheltha hle in ka hria a, first half chhung khan 3-0 vel ni hman tur a ni a, amaherawchu 1-1 niin tum khat chauh kan tihsual ah min hrem. Goal tha tak tak kan khung a, kan che tha hle. Fans te hnenah thil engemaw kan pe a, anni pawh in kan hnena pek let an nei. Fans te hian min thlawp tlat a, Pathianni hnua kan lawm leh hmasak ber tum a ni” a ti.
Dutch manager chuan sawi chhunzawmin,”Inkhelh tantirh phat atangin ze tha kan chhuah a, ball chan kan thei in midfield lai kan thunun hle bawk. Player te an tlan tam a, goal chance lah kan insiam nual bawk, chuvangin zanina kan khelhdan avangin kan hlim hle. Kan mualpho hnua team in ngai awh tura an chhanlet dan hi ka thlir fo a, tun hi tumkhatna chiah a nilo, tum nga emaw tum ruk-na a ni hial tawh ang. Kan insiamtha chak in kan thochhuak leh vat thei a, kan ze dik tak kan chhuah a ni” a ti.
Manchester United game leh tur hi Premier League match niin Southampton an hmachhawn dawn a, Ten Hag leh a hote’n Old Trafford ah Saints laka point 3 hmuh ngei an tum ang.
Red Devils hian league game 25 atanga point 49 hmu tawhin table ah 3-na anni mek a, Europa League leh FA Cup lamah beisei tur an la nei bawk.
