Manchester City manager Pep Guardiola chuan an Premier League nomawi kawllai chu a tawp thlenga humhim an tum thu a sawi a, chumi tur chuan player te pawhin theihtawp chhuah se a duh.
Champion lai City hi zanin zanlai dar 1 ah Emirates Stadium ah an lenglut dawn a, league hmahruaitu Arsenal nen an insu dawn. Inkhel hmuhnawm tak an chhawpchhuah ngei a rinawm a, he match hian a khawi lam zawk in nge league title chawi dawn tih a hril thui viau maithei bawk.
Game khata khel tam zawk chungin City hian Arsenal chu point 3 in an phak lo mek a, an nomawi kawllai humhim turin hna an la ngah ang reng hle.
City boss Pep chuan a tawp thlenga nomawi humhim an tum thu hetiang hian a sawichhuak,” A tawp thlengin kan nomawi kawllai hi humhim kan duh a, chumi tur chuan theihtawp kan chhuah pawh a tul. Kan bei nasa tawk lo anih chuan kan chungah engpawh thleng se kan pawm mai a ngai dawn a, chu chu ka player te rilru ah pawh hian awm reng se ka duh” a ti.
Gunners in an game hnuhnung pathum ah chakni hmel an hmu tawh lova, tun hnaia beisei pha lo deuh mahse Pep erawh in Mikel Arteta nau te hi a la dahsang hle.
”Point paih ngai mang lovin point an han paih chiah hian an game leh ah team hlauhawm tak anni thin. Chuvangin an(Arsenal) lak atang hian thil tha danglam tak beisei tur a awm ngei ang. An game hnuhnung pahnih ka en atang khan an khelhdan avanga point hloh anni in ka hre lo” tiin Pep chuan Arsenal chungchang a sawi bawk.
