Coupe de France atanga an tlak fel hnuin Paris Saint Germain head coach Christophe Galtier chuan an hrilhai thu leh an chakloh atanga inzir tur an nih thu a sawi.
Coupe de France Round of 16 match ah Marseille chuan an home Stade Velodrome ah Paris Saint Germain an lo mikhual a, mual neitu lam hian 2-1 a hnehna changin quartel final an inhlangkai a, Messi leh a hote’n he inelna hi an mangtha thung.
Nizan zanlai inkhelah Marseille tan Sanchez leh Malinovskyi te’n goal khat ve ve an khung a, Paris lam atangin Sergio Ramos an goal khat a khung ve bawk.
PSG lamin ball chang tam zawk mahse shot vawi 8 (on target vawi 3) chauh an nei a, Marseille lam hian ball chang tlem zawk mahse shot vawi 16 (on target vawi 8) lai an nei thung.
Inkhelh banah Christophe Galtier chuan hetiang hian tawng a thlah,”Kan lunghnur takzet a, a chhan chu Coupe de France hi kan chawi tum ber te zinga mi anih vang a ni. Team ropui tak Marseille in min hneh a, pawm thiam mai pawh a harsa kan ti hle.”
”Goal khata kan hnufual hnu khan duh ang in chance kan insiam tam tawk lo. Match khelh hmaa kan inbuatsaihna ah chuan qualify ngei kha kan tum a, chuvangin he match a kan chaklohna atang hian zirtur kan ngah hle a ni. Second half ah pawh chance kan nei tam tawk lova, kha aia team hlauhawm tur zawk kha kan ni. Player te pawh an hrilhai hle a, thinrim taka thil sawi buan buan na hun lah a ni hek lo. Kan inenfiah a theihtawpa tan kan lak a tul zawk.”
Coupe de France atanga tla hlim Paris Saint Germain hian an game leh ah AS Monaco an hmachhawn a, he match zawh hian UEFA Champions League Round of 16 first leg ah Bayern Munich an lo mikhual zui ang.