Portugal leh Hungary te inkhelh tumah khan Portugal captain Cristiano Ronaldo chuan Hungary lakah penalty hmangin goal a khung a, a celebrate uar hle a niang, Hungary coach Marco Rossi chuan final a goal khung ang mai tiin a sawi.
Hungary chuan Euro 2020 khelhah an match hmasa berah Portugal an hmachhawn a, Portugal lakah 3-0 lai maiin an tlawm a nih kha. Minute 87 na velah C Ronaldo chuan Euro 2020 a a goal hmasa ber tur penalty hmangin a khung a, huntawp dawn tepah goal dang a khung leh.
Kum 36 a upa Portugues superstar C Ronaldo hian Euro khelh mekah goal 5 khung tawhin top scorer a ni mek a, ram tana goal khung tam lamah Ali Daei a nih rual pui bawk, goal 109 ve ve an khung tawh a ni.
Mahse, Hungary laka Penalty goal a celebrate kha chu Hungary manager Marco Rossi chuan a ei thei vak lo a niang, tullo a ti hle.
Marco Rossi hian Juventus forward chu fak in, champion ropui a ni, mahse, Ronaldo hi a chang chuan thinurna chhuahtirtu a ni thei tiin a sawi bawk.
Kum 56 a upa Marco Rossi’an Gazzetta dello Sport a hrilh dan chuan, “Ronaldo hi champion ropui a ni, mahse, a chang hi chuan thinurna thlentu a ni thei” tiin a sawi.
“Kan laka penalty a pet goal hnu khan, final a goal khung ang maiin goal a celebrate a ni, mipui te hian hetiang thil hi chu sawi ve rawh se.” tiin a sawi bawk.
Hungary hi Group of Death ah awmin, an game hmasa berah Portugal chu hneh lo mahse, France chu 1-1 in an draw pui a, an game hnuhnung berah Germany chu 2-2 in an draw pui leh bawk. Group of death ah hian awm lo chu ni se, Round of 16 an luh ngei a rinawm.
Source SB