Spanish full back Jordi Alba chuan tun season Laliga title an chawi leh chawi loh chu an mahnia engkim innghat anih thu a sawichhuak.
Tun season kal mek ah Barcelona leh Real Madrid te hi league game khelh zat in ang reng ah Xavi leh a nau te’n point 8 laiin Carlo Ancelotti leh a nau te an tlansan tawh a, 2019 hnua league title chawi leh turin dinhmun tha takah an ding mek.
Champion lai Real Madrid in an nomawi kawllai humhim ngei tumin theihtawp an chhuah dawn a, season chawhnu lamah an tang nasa zual dawn. Barca tan pawh ngaihtha taka awm a theih ngawt bik lova, match 2/3 a in tluk leh thuak thei reng anni.
”Ka tawnhriat atanga ka sawi theih chu, tun season ah pawh hian kawng thui tak zawh tur kan la hma bak. Season tawp thleng rak in Madrid hian min umphak an tum dawn a, an tang nasa dawn. Tuna kan inthlauhna hi a tam ve thawkhat viau a, mahse ngaihtha taka awm thei kan ni ngawt lo. League title chawi chungchangah hian kan kutah engkim a innghat” tiin Jordi Alba chuan point 8 laiin fal tawh mahse inthlahdah thei an la nih loh thu a sawi.
Barca hian kumin ah Madrid chu Spanish Super Cup final ah an hneh a, Xavi enkawlna hnuaia title hmasa ber Barca in an chawi. He an hnehna chan hi a pawimawhna kum 33 mi Alba chuan sawi leh in,” Kan danglam hun tak a ni. Kan elpui ber anni a, an laka hnehna kan chan avangin a hma zawng aiin kan phur tawh.”
“Final tha tak a ni a, team chungnung zawk kan nih avangin nomawi chawi kha kan phu hliah hliah bawk. Kha game khan inrintawkna min pe a, a bikin player naupang zawk te ah, a chhan chu an nomawi chawi hmasak ber anih hlawm avangin. An tan chuan hun danglam bik a ni a, an hlim zia pawh an hmel ah hmuh theih in a awm” a ti.
