Real Madrid forward Eden Hazard chuan an manager Carlo Ancelotti nen an inkar boruak a sawi a, inzah tawn hle mahse an inbiak tawh ngai loh thu a sawi.
Belgium international hlui hian 2019 khan €100 million in Chelsea atangin Real Madrid a zawm a, Spain khawpuiah a kum 4-na hmang mêk mahse tun thlengin beisei a la pha lova, hliam in a tibuai nasa bawk nen tlâkhniam lam a pan tial tial a, World Cup hnuin team tan a la inlan leh miah lo bawk.
Hazard chuan manager Ancelotti nena an inkar boruak hetiang hian RTBF a hrilh, “Ancelotti leh keia inkarah hian inzahtawnna lian tak a awm a, amaherawhchu kan inbe thin erawh ka ti dawn lova, a chhan chu kan inbiak ngai loh vang a ni. Kan inzahtawn hle a, a chhan chu Ancelotti te ang hi chuan zah an phû hliah hliah a, football tana a thil tih te leh a manager career a hlawhtlinna ropui tak tak a lo chan tawh vang te a ni.”
Hazard hian Santiago Bernabeu ah kum 2024 thleng bak contract a nei tawh lova, tun hnai chho ah club dang nena sawizawm ni mahse Real Madrid a a contract neihlai hman zawh phawt chu a duhthusam a ni.
“A hma pawhin ka lo sawi tawh a, he hmuna cham zel rih hi ka duh. Inkhelh tama kan thei a ni tih hi ka lantir ka duh. Mite’n ka lakah rinna an hloh tawh a, thil pangngai mai a ni a, keipawhin ka hrethiam vek e. Keimah lam erawh in rinna ka la nei a, enge thleng zel dawn hriat va ni suh. Club danga insawn tumna rilru ka pu lem lo” tiin kum 32 a upa chuan a sawi bawk.
Hazard hian season kal mêk ah Real Madrid tan game 7 chauh a la khel a, nipui transfer bazar inhawn hunah chhuah duh lo viau mahse Real lam hian an tana player pawimawh ni phâk lo hi a chhuahna kawng an dap sak talh in a rinawm ve bawk.
