Liverpool manager Jurgen Klopp chuan tuna an dinhmun harsa tak atanga talchhuak turin mahni inrintawkna an neih kir a tul thu a sawichhuak. Reds hi league point 35 nen table ah 8-na anni mek a, ramchhung inelna FA Cup leh Carabao Cup inelna atangin an tla fel tawh bawk.
Season duhawm lo tak hmang mek mahse Liverpool hian an league game hnuhnung pahniha Everton leh Newcastle United te an hmachhawn tumin hnehna an chang ve ve a, ngai an awh chho tan.
Amaherawhchu a zawna match hnih an chak hnuin Champions League Round of 16 first leg match ah Real Madrid chu an khelmual Anfield ah an lo mikhual a, 2-5 laiin klopp leh a nau te hi an mualpho a, an tan Champions League beiseina a tawp tih theih tur a ni.
”Champions League a goal nga meuh chhuah hi pawmzam mai mai a harsa takzet a, chutihrualin anih tur ang ang a ni tawh. Madrid laka kan first half game kha a tha a, 2nd half lam erawh a chhe lulai hle thung!” tiin Reds manager Klopp an Real Madrid laka an game chungchang a sawichhuak.
German coach chuan sawi chhunzawmin,”Thil kan thlak danglam a ngai a, thil tha tam tak lo kir tawh mahse team nghet tak kan la nilo. Kan dinhmun her danglam turin mahni inrintawkna kan neih a tul a, inkhel mualah kan theihna tak tak kan pholang tur a ni. Tun ai tha mar zawka kan khelh theih a pawimawh takzet” a ti.
Liverpool hian tun Inrinni zanlai / Pathianni zinglam dar 1:15 ah Crystal Palace an hmachhawn dawn a, team pahnihte hi Selhurst Park ah an insu ang. Palace khelmualah Reds in record an nei tha a, league game hnuhnung 7 ah te hnehna chang fai vek in goal 22 lai khungin goal 2 chauh an chhuah thung.
Reds hian season chawhma lam hmang tha tehchiam lo mahse league game 16 lai khelh tur an la neih avangin insiamthat nan khua a la tlai lo. League ah champion inbeisei tawh lo mahse top 4 huanga season khar turin erawh chance an la nei chiang e.