Arsenal defender William Saliba chuan fans te hnenah a that dan bera a lo kir leh thuai tur thu a sawichhuak. France international hi tun season a Gunners player pawimawh ber pakhat a ni a, league-a a inlan loh hun chhung chu minute 14 chauh a ni.
FIFA World Cup 2022 a Les Blues tana minute 27 chauh inlan tu Saliba hian World Cup hnuin a form a hloh deuh niin a lang a, tha taka lo kir thuai a tum hle.
Arsenal leh Brentford te 1-1 a an inhnehtawk tumin Saliba hian mi pahnih ball inchuh (duels) ah vawi 10 lai a chak lo zawk ah a tang a, 1-3 a Manchester City an hnehloh tum pawhin Haaland leh a thiante a veng hneh lo hle bawk.
”World Cup atangin ka lo kir a, tun dinhmunah hian keimaha ka that dan berin ka khelchhuak lo tih ka hria” tiin Saliba chuan tun hnaia a form a hloh deuh thu a sawichhuak.
Kum 21 a upa defender chuan sawi chhunzawmin, ”Ka level a kir leh turin ka thawhrim a ngai a, ka khelhthat tum leh ka khelhchhiat deuh tum hi ka hre hle. He hmunah coach tha tak min tanpui tura a awm avangin ka vannnei takzet. Ka khelhthat tum chuan engkim a tha a, ka khelhthat loh tumin erawh coach (Arteta) hian ka tihdik loh lai te min hrilh a, min fuih fo thin.”
”He league hi khawvela league harsa ber a ni a, ka khelhthat tawk loh chuan ka tha tawk lo tihna a ni mai, chhuanlam tur pakhat te mah ka nei lo. Premier League a ka season khatna a ni a, ka that dan berin ka lo kir thuai ang, chutihrual chuan rim taka ka thawh a tul tih erawh ka hria.”
Premier League hmahruaitu Arsenal hian zanin dar 8:30 ah Leicester City an luhkhung dawn a, hnehna chan a point 3 hlawhchhuah an tum ngei ang.