Paris Saint Germain in an game hnuhnung bera 4-3 a Lille an hneh hnuin Spanish defender Sergio Ramos chuan free kick hmanga chakna goal khungtu Lionel Messi nen team khata an kheldun thei chu a lawm thu a sawichhuak.
UCL Round of 16 1st leg a Bayern Munich an ngam loh hnuin Ligue 1 champion Paris Saint Germain chuan league ah Lille an hmachhawn zui a, 4-3 hnehna changin league point 57 nen table chung ber an luah chhunzawm zel.
He inkhelah hian Neymar leh Mbappe te chuan PSG goal hmasa pahnihte hi an khung a, Lille lam atangin Diakite chuan minute 24 na ah goal khatin a rawn chhang let ve. 2nd half minute 58 na ah David chuan penalty spot atanga goal a khung hnuah Bamba chuan Lille goal thumna rawn khung leh in a team chu 3-2 in hma a hruaipui ta!
Mual neitu lam an tlawm dawn emaw tih hnuin Mbappe chuan mnute 87-na ah team pahnihte in draw na goal a rawn khung a, minute 90+5 na ah Lionel Messi chuan freekick hmanga PSG chakna goal khung zui in a team chu point 3 hlu tak a hlawhchhuah pui.
Inkhelh banah Ramos chuan Messi an chakna goal a khung chungchang leh team khata an khelhdun theih avanga a lawm thu hetiang hian a sawi,”Messi thiltih hian ka mak tih a hlawh tawh lo! Vawiin (vs Lille) ang khan Barca-a a awm lai pawhin game a danglamna thlentu a ni fo a, Ka team-a a awm hi ka lawm em em zawk. Messi khelhpui nih hi a tha em em a, tu hnenah pawh Messi khelhpui nge a tumpui nih i duh zawk ti ila rang takin a chhana i dawng chhunzawm nghal ang” a ti.
Messi leh Ramos te hi Laliga ah team inhal tak pahnih Barcelona leh Real Madrid tan hun rei tak an lo khel tawh a, El Clasico ah player pahnihte hi an lo inbakkaih fo tawh nghe nghe anih kha. Beisei loh takin 2021 khan payer pahnihte hian free transfer in PSG an zawm ve ve a, kumin nipui bazar thleng contract an la nei dun bawk a ni.
